Skip to main content

Kim: Ilinniartitaaneq namminiilivinnissamut aqqutissaavoq

Ilinniartitaanerup qaffasissusaa kivinneqassaa, taamaanngippat Nunarput nammineersinnanngilaq. Kim Kielsen taama isumaqarpoq.

Namminiilivinnissamut sinnattortoqarusaanginnassanngippat, taava iliuuseqarnissaq pisariaqavippoq, tassalu ilinniartitaaneq.

Naalakkersuisut siulittaasuat, Kim Kielsen (S) taama isumaqarpoq.

- Ilinniartitaanermut qaffasissuseq kivinneqassaaq. Namminiilivissangutta inuiaqatigiit ilinniarluarsimanissaat pisariaqarpoq, taanna Sermitsiaq.AG-mut oqarpoq.

Namminiilivinneq akisooq

Namminiilivinnissaq pillugu massakkut aningaasatigut unammilligassat ukkatarineqarput.

Kalaallit Nunaat nammineertoq bloktilskudi 3,7 milliardinik nalilik taarsertariaqarlugulu oqartussaaffiit illersornissamullu oqartussaaffinnut aningaasat 1 milliardid nassaarissavaat taakku saniatigut innuttaasunut utoqqaliartortunut aningaasat 1 milliardit aamma nassaariniartussaassagaat, ministeriunerup Lars Løkke Rasmussenip tikkuarpaa.

- Maannakkut aningaasatigut nammineersinnaanngitsoq takusinnaavara, Lars Løkke Rasmussen (V) oqarpoq.

Atituumik tunngavik

- Soorunami aningaasatigut unammilligassaqarpugut, kisianni isumaqarpunga ingerlalluartugut. Taamaattoq aalisarneq suli aningaasaqarniarnitsinnut suli pingaarutilerujussuusoq, taanna oqarpoq.

Naalakkersuisut nunatta aningaasaqarnikkut atituumik tunngavilerneqarnissaa sulissutigingaat, taanna tikkuaavoq. Aalisakkammi massakkut akingissaaraluarpataluunniit tassanngaannaq killormut saatinneqarartarsinnaapput.

Aammalu qanorluunniit aalisarnerup Kalaallit Nunaat nammineertoq aningaasalersorsinnaanngilaa.

- Taamaammat pingaaruteqarpoq mittarfiliornissat aallartinnissaat, pingaaruteqarpoq aatsitassalerinermik aallartitsinissarput aammalu pingaaruteqarpoq aaqqissuusseqqinnerit aallartinneqarnissaat.

Aalajangingassat kinguartitserneqarunnaassapput

Aaqqissuusseqqinnissat politikerit akornannit tamatigut nuannarineqarpallaarneq ajorput. Qinersisartut arlariinnik ataatsikkut allannguisoqaleraangat toqqissisimajunnaartarput, aammalu aaqqissuusseqqinnerit eqimattanut aalajangersimasunut eqquinerlussinnaasarlutik.

Allamillu aqqutissaqanngitsoq, Kim Kielsen (S) isumaqarpoq.

- Aalajangiinissanut oqimaatsunut oqitsunullu aalajangiinissatsinnik pisuussaaffeqarpugut. Aalajangingassanik kinguartiteriinnavissinnaanngilangut.

Kinguaariit tullii periarfissinneqassasut

Inuussutissarsiornikkut periarfissat aaqqissuusseqqinnerilluunniit naammangitsut, taanna naqissuseeqqippoq.

- Pingaarnersaavorlu: Ilinniartitaaneq salliutissangatsigut.

Naak Kim Kielsenip (S) arlaleriarluni namminiilivinnissamut aqqut aalajangerneqareertoq naqissusertarsimangaluarlugu, tamanna qaqugu anguneqassanersoq eqqoriarsinnaanngilaa.

- Naggataani kinguaariit tulliisa siunissartik qanoq ikkumaarnerat aalajangertussaavaat. Uangut periarfissiinnartussaavagut.

Una allaaserisaq Kim Kielsenip Kalaallit Nunaat nammineertoq pillugu takorluugaasa pingasuusut aapparivaa. Siulleq uani atuarsinnaavat: Kim: Namminiilivinnissamut aqqut aalajangerneqareerpoq

Velkommen til debatten
  • Oqallinneq malinnaaffigalugulu peqataaffigerusukkukku cookie akuerissavat.
  • Sermitsiaq.AG-p atuartartut akunnerminni isumaqatigiinngikkaluarpataluunniit kissaatigaa, pitsaasumik oqallittoqartarnissaa. Oqallinnissamut malittarisassavut unioqqutinneqarpata oqallinnermut peqataaqqusaajunnaartitsisoqarsinnaavoq.oq .
  • Peqqarniitsumik oqaaseqartoqarsimaneranik nalunaarutiginnittoqarsinnaavoq, "rapporter" toorlugu imaluunniit ”markere som spam” toorlugu”.

Forsiden lige nu

SENESTE NYHEDER