Skip to main content

Kim Godtfredsen: Inuusuttut iliuuseqarfigineqartariaqalerput

- Naalakkersuisutta inuusuttut iliuuseqarfigisariaqalerpaat, Kim Godtfredsen kaammattuivoq

- Oqaluttuarisaanitsinni aatsaat taama suliffissaaleqisut amerlatigaat, inuusuttullu sorsunnersuup aappaattut assingusumik unittoorfigisinnaallugu. 

Timi Asimimi aqutsisoq Kim Godtfredsen allappoq. 

18-it 24-llu akornanni ukiullit januaarimi 987-it suliffissaaleqisuunerat taama qisuariaateqarfigaa. 

- Kisitsit paatsuugassaanngilaq. Naalakkersuisut inuusuttatsinnut iliuuseqartariaqalerput, ilinniaqqinnissaannut aqqutissiuunneqartariaqarpummi. Taamaasiortoqanngippat siunissaq pitsaasuunavianngilaq, inuiaqatigiimmi ineriartornerat ajalasuussaaq, Kim Godtfredsen oqarpoq. 

Inuusuttut Timi Asimiikkaangata sammisaqartinneqartarput, tassani anguniagaqalernissaat pisinnaasaallu suliarineqartarlutik. Sammisaqartinneqartarneralli maannakkut uninngavoq, maannakkullu inuusuttut 20-t imminut tatiginerat suliarineqarnissaat, naleqartitaat inuunermilu ingerlaqqinnissaat sammisaqartitseqqinnissap tungaanut utaqqiinnarpaat. 

- Pitsaasumik iliuuseqaraluarpugut, suliarpummi pingaaruteqarpoq. Qujanartumilli Timi Asimi aallarteqqingajalerpoq, assigiinngitsunit aningaasaliiffigineqarlunilu tunissuteqarfigineqartussaavugut. Pisarnertuulli ajoraluartumik aningaasaqarneq pissutaalluni tulliani sivikinnerusumik ingerlanneqassaaq, Kim Godtfredsen oqarpoq. 

Timi Asimi aqqutissaanngitsoq kisialli aallartisaataalluartuusoq oqaatigaa.

Naalakkersuisut iliuuseqartariaqartut
- Piareersarfinnut qinnuteqartartut meeqqat atuarfianni angusarissaartaraluarput, Piareersarfimmullu atuaqqittariaqanngikkaluarlutik. Inuusuttulli amerlasuut imminnut tatiginngippallaarput taamaattumillu qaffassaqqinnissaq pisariaqartittarlugu. Meeqqat atuarfiinili anisarput imminut tatiginatik pisinnaasatillu qularalugit, Kim Godtfredsen oqarpoq nangillunilu:

- Naalakkersuisut aningaasaliissutissanik kommuninut tamanut nassaartariaqarlerput, kiisalu namminersortut amerlanerusut suleqataanissaat aamma ammaffigisariaqalerlugu. Kommunit suut tamaasa nammassinngaanngilaat. 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER