kiffartuussinissamik isumaqatigiissutit
Kim: – Angallassinerup ajorseriarnissaa siunertarinngilarput
Siumup siulittaasuata erseqqissarpaa ilaasut ajornerusumik atugassaqalernissaat partiip siunertarinngikkaa.
Kim Kielsen Siumup siulittaasuatut tusagassiorfinnut nalunaaruteqaqqammerpoq, immaqa tupaallannarujussuanngitsumik imalimmik.
– Ilaasunik angallassinerup ajorseriarnissaa Siumup siunertarinngilaa, Kim Kielsen (S) tusagassiorfinnut nalunaarummi qulequtaani allappoq.
Siunertarinngilarput
Pingaartumik Kujataanit sapaatip akunnerini kingullerni Diskolinemik kiffartuussinissamik isumaqatigiisutit sakkortuumik isornartorsiorneqarsimapput.
– Tusagassiorfitsigut sivisuumik sammineqarsimavoq Kujataani Qeqertarsuullu Tunuani ilaasunik angallassinermi atugassarisat ajorseriassasut, Kim Kielsen (S) tamanna pillugu allappoq.
– Siumumiilli erseqqissassavarput ilaasunik angallassinermi pissutsit ajornerulernissaat imaluunniit akit qaffasinnerulernissaat siunertarinngilluinnaratsigu, Kim Kielsen erseqqissaavoq.
Isumaqatigiissutit Naalakkersuisut akuersissutigaat
Siumup siulittaasuata tullia Jørgen Wæver Johansen kiffartuussinissamik isumaqatigiissutinik, naalakkersuisut akuersissutigisimasaannik, sakkortunerpaamik isornartorsiuisut ilagaat.
– Taamaattumik naatsorsuutigilluinnarparput novembarip qiteqqunnerani 2017-imut aningaasanut inatsisissap Inatsisartuni naammassillugu oqaluuserineqannginnerani timmisartunik umiarsuarnillu angallassinermi kiffartuussinissamik isumaqatigiissutit ajorseriarnagit naammassillugit suliarineqareersimassasut, Kim Kielsen (S) naggasiivoq.
Attaveqarnermut Naalakkersuisup Knud Kristiansenip (A) arlaleriarluni erseqqissartareerpaa kiffartuussinissamik isumaqatigiissutit atsiorneqareersimasut allanngortinneqarsinnaanngitsullu.