Skip to main content

Kim: Aallussilluni anguniagaqarneq iluatsippoq

Sakkutooqarfiusimasuni saliinissamut isumaqatigiissutit marluk iluatsinneqarneranni amerlasuut piginneqataapput, Kim Kielsen isumaqarpoq

Sakkutooqarfiusimasut salinneqarnissaannut isumaqatigiissutit marluk, Naalakkersuisut siulittaasuata Kim Kielsenip (S) uani sapaatip akunnerani naalagaaffeqatigiit ataatsimiinnerannit angerlaatissavai.

Siullermik marlunngormat illersornissamut ministeri Claus Hjort Frederiksen ataatsimeeqatigaa. Tassania Kangilinnguitpillugit isumaqatigiissummik atsioqatigiittoqarpoq.

Aqaguanilu naalagaaffeqatigiinneq pillugu ataatsimiinnermi qanoq pilersaarnermik nalunaarummik atsioqatigiittoqarpoq, tassa danskit naalakkersuisuisa ukiuni tallimani tulliuttuni amerikamiut sakkutooqarfigisimasaanni saliinissamut ukiumut 30 millionit koruuninik aningaasaliisassasut.

- Amerikamiiut sakkutooqarfigisimasaanni avatangiisinik saliisoqarnissaanut isumaqatigiissut pingaaruteqarluinnartoq isumaqarpunga, Kim Kielsen Sermitsiaq.AG-mut oqarpoq. 

Tasiilap ungasinngisaani sakkutooqarfiusimasoq Ikkatteq allattorsimaffimmi siullerpaavoq, tassani uulianut nappartat 100.000-t pinngortitami manngertornerlutik uninngapput.

Nalunaarsorneqassasut
- Mingutsitsineq annertunerpaaq ersarinnerpaarlu Tunumi Ikkattimiippoq. Tassani siullermik eqqakkat aamma mingutsitsinerup suuneri nalunaarsorneqassapput, taamaalillutik illersorneqarsinnaasumik peerneqassapput, Kim Kielsen oqarpoq.

Taakku 30 millionit koruunit maanna illersornissamut isumaqatigiissutip ilaatut aningaasanut inatsimmi immikkoortinneqassapput. Tamatuma kingorna sulineq sukkasuumik allartikkumaartoq Kim Kielsenip naatsorsuutigaa, kisianni aningaasat tamakkerlugit atorneqanngippata ukiunut tulliuttunut nuunneqarsinnaanngorlugit isumaqatigiissummi ilanngunneqarpoq.

Ilisimatuussutsikkut misissuinerit mingutsitsineq ilimagisamit annertunerusoq takutissagaluarpassuk, isumaqatigiissut sivitsorneqarsinnaassaaq.

Camp Centurymut tunngatillugu ilisimatuut aasaanerani sermip ataaniittut sorpiaanerinik misissuissapput.

Isumaqatigiinnginnerup isumaqatigiissutit taamaatissanngilaa
Una isumaqatigiissut Kangilinnguanut tunngassuteqanngitsoq, Kim Kielsenip (S) tamatuma saniatigut naqissuserpaa. Tassani immikkut ittumik isumaqatigiissuteqartoqarpoq, tassani illersornissamut ministerip Claus Hjorth Frederiksenip aningaasat nammineq missingersuutiminit nassaarissavai.

 

Kangilinnguit pillugu isumaqatigiissutip apeqqummi isumaqatigiinngissutaasut tamaasa aaqqinngilai.

- Kangilinnguanut tunngatillugu oqarpugut: Sumiiffiit salinneqarnissaannut isumaqatigiiffigisatsinni saliilluta aallartinniarta, naak suli avatangiisinut tamakkiisumik saliinissamut isumaqatigiissuteqanngikkaluarluta, Kim Kielsen (S) naqissusiivoq.

Uulimik mingutsitsiviusuni qanoq saliilluartoqartigissaneranik tassani isumaqatigiinngissutaaneruvoq.

- Apeqqutit taakku paasiumaarpagut. Tamannalu isumaqatigiissutigaarput, Kim Kielsen (S) oqarpoq.

Kangilinnguit maanna ammarneqaqqilermat danskit illersornissaqarfia saliinissamut piffissaqarnerulerpoq. Sakkutooqarfiusimasumi inissat piiarlugit siullermik aallartissinnaapput. Piffissamilu tassani Naalakkersuisut aamma danskit naalakkersuisuisa apeqqutip sinnera isumaqatigiissuteqarfiginiarsinnaavaat.

Aallussilluni anguniagaqarneq
Kim Kielsenip (S) naak isumaqatigiissutit taakku marluk nuannaarutigigaluarlugit, taakku iluatsinnerat nammineerluni iluatsinnerat nersorneqaatigerusunngilaa.

- Aallussilluni anguniagaqarneq maanna Kangilinnguit salinneqarnissaannut isumaqatigiissuteqarnermik kinguneqarpoq, kiisalu amerikiamiut sakkutooqarfigisimasaanni allamik aamma isumaqatigiissuteqarnissamik kinguneqarluni. Ukiorpassuarni Inatsisartuni Naalakkersuisuni iliuuseqarneq tamatumunnga tunuliaqutaavoq, taanna oqarpoq.

 

Aammattaaq allat inuit namminneq nersorneqatigisinnaanngikkaat isumaqarpoq.

- Vittus Qujaukitsup sakkortuumik oqariartuuteqarnera taamatut kinguneqartitsinngitsoq isumaqarpunga, Naalakkersuisut siulittaasuat oqarpoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER