Killissamik qaangiisoqaraangat: Aasianni pisoq alianartoq
Meeraq mikisoq qimminit qimuttunit saassunneqarnermi kingorna qanittukkut toquvoq. Pisimasoq alianartoq ilaanneeriarluni pisartoq. Qimmit qimuttut amaqqumit qanittumik kingoqqisuupput mianersortumillu pineqartariaqarlutik.
Nunatsinni qimmeq qimuttoq, qimminit allanit allaanerulluinnarpoq piumassuseqqortoorujussuulluni. Qimmiullunili immikkut ittunik ilisarnaatilik.
- Kalaallit qimmiat qimuttoq qimmiuvoq qimminit allanit akuneqarsimanngitsoq, Namminersorlutik Oqartussani uumasut nakorsaasa qullersaat Anna Jespersen oqarpoq.
Aviisi AG taama allappoq.
Qimmip qimuttup immikkut ittunik qujagineqarluartunillu piginnaaneqarnini ilisimaneqaatigai. Qamutit oqimaaqisut isorartuukkut uniarsinnaavaat silamilu Issittup silaani nilleqisumi silamiiginnarsinnaallutik.
Aammali qaasuttuunertik takutissinnaasarlugu.
Aasianni meeraq arfinilinnik ukiulik sapaatip akunnerata siuliani qimminit qimuttunit saassunneqarnermi kingorna toquvoq. Aamma ajoraluartumik siullermeerluni alianartumik taama pisoqanngilaq.
Qimmit qimuttut qaasussinnaasarput. Taamaattumik mianersorfiginissaat ataqqineqarnissaallu pingaaruteqartoq, uumasut nakorsaat Anna Jespersen nassuiaavoq.
- Kalaallit qimmiat qimuttoq qisuariarnernit sunnertiasuummat, pisunit aqunneqalersinnaasarpoq. Soorlu meeqqat pissusilersornerat peqqusaarnertut sunniuteqarsinnaasarpoq. Meeqqat pinnguarnerat, arpaqattaarnerat, suaartarnerat nillianerallu qimminut qimuttunut sakkortoorujussuarmik misinnarsinnaasarput. Sooq saassussisarnersut oqaatigissallugu ajornakusoorpoq, pineqartorli tassaasarluni killissanik qaangiisoqartarnera, Anna Jespersen oqarpoq.
Aviisimi AG-mi atuarnerusinnaavutit. Aviisi uani pissarsiariuk:
