Killiliisa nalilersorneqareerluni ingerlaqqippoq: Nalilersuineq suli saqqummiunneqanngilaq
Naalakkersuisut periusissiaat, Killiliisa, naammassilluinnalerpoq. Periusissiaq nalilersorneqareerpoq, kinguaassiutitigullu atornerluisoqartarneranut pitsaaliuinissamut suliat allatut iluseqarlutik nangeqqinneqassapput. Aaqqissuisoqarfimmit nalilersuineq piniarneqaraluartoq suli tunniunneqanngilaq.
Kinguaassiutitigut atornerluisarneq akiorniarlugu Naalakkersuisut periusissiaat 2018 – 2022, Killiliisa, naammassilluinnalerpoq.
Meeqqanut, inuusuttunut ilaqutariinnullu naalakkersuisoq, Mimi Karlsen (IA), tusagassiorfinnut nalunaaruteqarluni ilisimatitsivoq periusissiaq nalilersorneqarsimasoq, periusissiarlu "anguniakkanik aallaaviusunik inerneqartoq".
- Kinguaassiutitigullu atornerluisarneq pitsaaliorniarlugu sulinermi pingaarutillit ilagisaat tassaapput iliuutsit paquminartitsiunnaartunik sunniutillit, tamanna Killiliisap nalilersorneqarnerani erserpoq. Tamanna tunngavigalugu Killiliisami pitsaaliuinermik suliaqaannarnermi suli paasissutissanik ilisimasanillu avitseqatigiinnernik imaqassaaq, nalunaarutigineqarpoq.
Killiliisamik nalilersuineq Sermitsiaq.AG-p qaammatini arlalinni kingullerni pissarsiariumallugu saaffiginnissutigisaraluarpaa, sulili iluatsinnagu. Januarimi saaffiginneqqaarnermiit maannakkumut naalakkersuisut ilisimatitsissutigisarpaat nalilersuineq nutserneqartoq, atuaqqissaarneqartoq, maannalu saqqummiunneqangajalersoq.
Suliniutit arlallit aallartissimapput
Paquminartitsiunnaarnissamik suliniutit, Killiliisap suliarisimasaasa ilagaat tusarnaagassianik podcastiliorneq, piviusulersaarutinik suliaqarneq, isiginnaagassialiornerit aammalu sulianik ilisimasalinnut najoqqutassialiornerit.
Inunnut kinguaassiutitigut kannguttaatsuliornermik pissusilersortartunut katsorsaavik, Klinik Killiliisa, ukioq manna pilersinneqarpoq. Neqeroorut ajunngitsumik atorluarneqarpoq, naatsorsuutigisamiit innuttaasut amerlanerujussuit neqeroorummik ujartuillutillu atuimmata.
Naalakkersuisoq Mimi Karlsen tusagassiorfinnut nalunaaruteqarluni ilisimatitsivoq isumaginninnermut aqutsisoqarfimmi Innuttaasunut immikkoortortaqarfiup Paarisa peqatigalugu atuakkiortoq Laila Andrésip suleqatigileraa. Atuakkiortup atuakkiaa “Bag smilet” saqqummeqqammerpoq, kinguaassiutitigullu atornerlunneqarnermut tunngalluni.
Akisussaaffimmi naalakkersuisuusimasoq, Paneeraq Olsen, Sermitsiaq.AG-mut siornatigut nassuiaasimavoq Killiliisa pillugu nalilersuineq suliniutinik innersuussanik imaqarumaartoq, taakkulu qanoq ingerlanneqassanersut pillugit naalakkersuisut aalajangiiumaartut.