Killilersuutit Nuummi sivitsorneqarput
Nuummi tamat iserfigisinnaasaanniissagaanni akiuussusertissimanissap atuunnera 31. oktoberip tungaanut sivitsorneqarpoq. Sisimiuni killilersuutit aqagumiit atuukkunnaassapput.
Killilersuutit maanna atuuttut unnuap qeqqanut atorunnaarpata, Nuummi killilersuisoqarnera unissanngilaq.
Sumiiffiit ilaannukarnissami tamakkiisumik akiuussusertilluni kapitissimanissaq imaluunniit coronamik tunillatsissimannginnermut uppernarsaammik sivisunerpaamik nalunaaquttap akunnerinik 48-nik pisoqaassusilimmik takutitsisarnissamut piumasaqaat, oktoberip 31-ata tungaanut atuuttussanngorlugu Naalakkersuisut sivitsorpaat.
Piumasaqaat Sisimiuni aqagumiit atuukkunnaassaaq.
Maleruagassat atuarfinnut, ulluunerani paaqqinniffinnut, suliffeqarfinnut assartuutinulluunniit tamanit atorneqartartunut atuutinngillat.
Ukununngarsinnaavutit tamakkiisumik kapitissimaguit imaluunniit coronamik tunillatsissimannginnermut uppernarsaammik sivisunerpaamik nalunaaquttap akunnerini 48-nik pisoqaassusilimmik takutitsisinnaaguit:
- Neriniartarfiit, kaffisorniartarfiit, imerniartarfiit, diskotekit assigisaallu, kiisalu silami nunaminertat taakkununnga atasut.
- Kulturikkut sullissiviit: kulturikkut illorsuit, filmertarfiit, katersugaasiviit, inersuit saqqummersitsiviit assigisaallu.
- Innuttaasut illui assigisaallu.
- Atuakkanik atorniartarfiit.
- Illup iluani silamilu timersortarfiit, soorlu init timersortarfiit, inersuit timersortarfiit, naluttarfiit, timigissartarfiit aamma isikkamik arsartarfiit.
- Nujalerisut, tagiartuisartut, pinnersaasarfiit assigisaallu.
Isilernermi uppernarsaateqarnissaq
Nuummi tunillatsissimasut maanna 118-iupput. Tunillatsissimasoq inuusuttoq napparsimmavimmut unitsinneqarsimasoq sisamanngornermi ilisimatitsissutigineqarpoq.
Nuummi misissuisarfik sapaatit akunnerni kingullerni misissungarpassuaqarpoq, misissortittut ullormut 600-t tungaannoortarlutik. Meeqqeriviit meeqqallu ornittagaat allat tunillatsiffiusarsimasut paasineqarput, utoqqarnillu sullissisuni aamma tunillatsittoqarsimasoq paasineqarsimalluni. Imerniartarfinni tunillaassuuttoqangaatsiarsimasoq aamma paasineqarsimavoq.
Akisuanerit Festival, Nuummi sapaatip akunnerata naanerani annertuumik aaqqissuussaqartoq Facebookimini ilisimatitsivoq tusarnaariartut coronapaseqarnersut isilernermi misissorneqassasut.
Akiuussusersimanngitsut pisiniarfinnut, allakkerivinnut, timmisartoqarfinnut, pisortat sullissiviini saaffiginnittarfiinut, utaqqisarfinnut suliffimminnullu suli ornigussinnaapput.
Angerlarsimaannarnissaq suli attatiinnarneqarpoq
Nuummiit angalasut akiuussuserneqarsimanngitsut tikiffimminni angerlarsimaqqaaginnartarnissaannik suli piumasaqarfigineqartut, Naalakkersuisut ilisimatitsipput:
- Innuttaasut akiuussusersimanngitsut, Nuummiit angalasut tikiffimminni malittarisassaqartinneqassapput. Tikinnermit ullut tallimassaanni misissortereernerup tunillatsissimannginneq takutippagu, misissortinngikkaannili ullut 14-it angerlarsimaqqaarluni, aatsaat tamat orniguffigisinnaasaannut katersuunnernulluunniit peqataasoqarsinnaasassaaq, Naalakkersuisut tusagassiorfinnut nalunaaruteqarlutik ilisimatitsipput.
Nuummiit angalasunut akiuussusersimanngitsunut malittarisassaq 31. oktober tungaanut atuuppoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...
