Killilersuutit allanngortinnissaanut sulisoqarpoq
PCR atorlugu coronamut tunillatsissimanermut misissuutit innuttaasunut sanngiinnerusunut angalasunullu taamaallaat atuutsilersinneqarmata, killilersuutit nalimmassarneqarnissaanut Naalakkersuisut aamma partiit siuttui aalajangertussanngorput.
PCR atorlugu misissuutit atorneqarnerat annikillineqarmat killilersuutit nalimmassarnissaannut Naalakkersuisut aamma partiit siulittaasui aalajangerniartussanngorput.
Naalakkersuisut siulittaasoqarfiani pisortaq Hans-Peder Barlach-Christensen Sermitsiaq.AG-mut taama ilisimatitsivoq.
Naalakkersuisut ataasinngornermi tusagassiortunik katersortitsinermi ilisimatitsipput PCR atorlugu misissuutit innuttaasunut sakkortuumik ersiuteqartunut perululersinnaasunullu, kiisalu angalasussanut kisimik atorneqarsinnaalersut.
Tamanna isumaqarpoq innuttaasut arlallit angerlarsimallutik misissornerminni tunillatsissimanermik paasisaqaraluarunilluunniit PCR atorlugu misissortissinnaajunnaarmata.
- Killilersuutinut tunngatillugu Naalakkersuisut partiillu siuttui arlalinnik nalilersugassaqarput, PCR atorlugu misissuutit allatut atorneqalernerat pissutigalugu. Nalimmassaanissat politikkikkut aalajangerneqareerpata nalunaarutigineqarumaarput, Hans-Peder Barlach-Christensen oqarpoq.
Akiuussusersimanngitsut iseqqusaanngitsut
Nalunaarutit maanna atuuttut malillugit akiuussuserneqarsimanngitsut, meeraagunik inersimasuugunilluunniit, inuit katersuuffigisinnaasaannut isersinnaatitaanngillat. Orniguffissat killilersuuteqarfiusut ilaat tassaapput timersortarfiit, neriniartarfiit, kulturip illui aamma pisiniarfiit nerisassaarniarfiunngitsut.
Innuttaasut akiuussuserneqarsimanngitsut covid-19-imik sapaatit akunneri kingulliit aqqaneq-marluk iluini tunillatsissimallutik peqqissereersimasut, tunillatsissimanermut uppernarsaateqarunik taaneqartunut isersinnaapput.
Innuttaasut ilaat PCR atorlugu misissortissinnaajunnaarneranni, tunillatsissimasut akiuussuserneqanngitsut tunillatsereersimanermut uppernarsaammik pisinnaajunnaarallarput. Angerlarsimaffimmimi misissuut atorlugu tunillatsissimaneq paasineqarpat, tamanna tunillatsissimanermut uppernarsaammik qinnuteqarnermut atorsinnaanngilaq.
Naalakkersuisut killilersuutinik nalimmassaanerat pillugu 25. januariutinnagu nalunaartoqarumaartoq ilimasaarutigineqarpoq. Ulloq taanna aamma neriniartarfiit imerniartarfiillu aalakoornartunik imigassanik sassaallerfiusartut nal. 22.00-5.00 matoqqasarnissaannut killilersuut killeqarpoq.