Killiffik: Kujataani meeqqat pillugit nalunaaruteqartarnerit marloriaataat sinnerlugit amerlisimasut

Kommuni Kujallermi meeqqat 2021-mi nalunaarutigineqarsimasut ukiup siulianut sanilliullugu marloriaataat sinnerlugit amerlisimasut, nalunaarusiami allassimavoq. Tamatumunnga suna pissutaanersoq erseqqinngitsoq oqaatigineqarpoq.

Kommunini arlalinni meeqqat atugaannik ernumassuteqarluni nalunaaruteqartarnerit amerliartortut, kalaallit-danskit isumaginninnikkut suleqatigiinnerisa killiffia pillugu nalunaarusiami atuarneqarsinnaavoq.

Suleqatigiinnermut atatillugu aalajangiunneqarsimavoq, meeqqat nunami maani atugaasa qanoq ingerlanerat suleqatigiinnermilu angusarineqarsimasut susassaqarfimmi kisitsisinik katersinikkut - taakkununnga ilanngullugit nalunaarutit amerlassusaannik nalunaaruteqarnermik malitseqartinneqassasut.

Paasissutissanik katersiniarneq suli ajornartorsiutitaqarpoq, sumiiffiillu ilaannit paasissutissat tunniunneqartut amigaateqarlutik, taamaammat tamatuma qanoq ingerlanera takujuminaappoq. Assersuutigalugu Avannaata Kommunianit meeqqat Ilulissaniittut kisimik nalunaarutigineqarsimanerat kisitsisaatigineqarpoq, tassa kommunimit tamarmiusumit pinnani.

Kujallermi meeqqat inuusuttullu 25 procentii nalunaarutigineqarsimasut

Kommunini allani kisitsisit tunniunneqarsimasut erseqqinnerupput - soorlu assersuutigalugu Kommuni Kujallermit tunniunneqarsimasut.

Naluaarusiaq naapertorlugu, kommunimi meeqqat inuusuttullu 0-17-inik ukiullit pillugit 2021-mi nalunaarutigineqarsimasut 827-upput. 2020-mut sanilliullugu 107 procentimik amerlanerusut, nalunaarusiami allassimavoq.

Taamaalilluni kommunimi meeqqat inuusuttullu 25 procentii 0-17-inik ukiullit 2021-p ingerlanerani nalunaarutigineqarsimapput. Amerleriarsimanerannulli suna pissutaanersoq erseqqissumik oqaatigineqanngilaq. Nalunaarusiami erseqqissaassutigineqarpoq, nalunaarutigineqarsimasut amerlanerulersimanerannut nalunaarsueriaatsip pitsaanerulersinneqarsimanera, nalunaarutigineqartut amerleriarsimanerat imaluunniit taakku marluutillugit imminnut ataqatigiissinnaanerat pissutaasinnaasut.

Kommunini sisamaasuni allani kisitsisit imatut isikkoqarput:

  • Kommuneqarfik Sermersuumi nalunaarutiginninnerit siorna 22 procentimik amerlisimapput. Taamaalilluni 2019-imisulli nalunaarutigineqartut amerlatigalutik. Tassani inerniliunneqarpoq, kommunimi meeqqat minnerpaamik 15 procentii nalunaarutigineqarsimasut.
  • Qeqqata Kommunianit 2020-mi 2019-imilu nalunaarutigineqarsimasut 900-t missaanniittut merlaqqataat 2021-mi nalunaarutigineqarsimapput, taamaalilluni kommunimi meeqqat inuusuttullu 22 procentii nalunaarutigineqarsimallutik.
  • Kommune Qeqertalimmi meeqqat inuusuttullu 224-t nalunaarutigineqarsimasutut nalunaarsorneqarsimapput. Matumani kommuni siullermeersumik ukioq tamakkerlugu kisitsisinik nalunaarusiamut ilanngussisimavoq, tassanilu kommunimi meeqqat 10 procentii nalunaarutigineqarsimallutik.
  • Avannaata Kommunianit aammaarluni Ilulissanit nalunaarutiginnissimanerit kisimik saqqummiunneqarsimapput. Ilulissani meeqqat inuusuttullu 0-17-inik ukiullit 427-t nalunaarutigineqarsimapput, tassa 2020-mut sanilliullugu 36 procentimik amerlanerusut. Kommunimit nalunaarusiami ilisimatitsissutigineqarpoq, nalunaarutigineqartut amerlanerulersimanerannut meeqqat aalajangersimasut ikinnerit arlaleriarluni nalunaarutigineqarsimanerat kiisalu kommunimit sulisut nalunaarutiginnittussaaneq pillugu ilisimatitsissuteqartarneq pissutaasut.

Nunami maani isumaginninnikkut suliaqartarnermi ajoqutaasartoq tassaavoq, suliassarpassuit kommunini suliarineqartannginnerat. Danskit-kalaallit suleqatigiinneranni suliassat suliarineqarsimanngitsut ikilisarneqarnissaat ukkatarineqarsimavoq, tassungalu atatillugu inerniliunneqarsimavoq, "suliassat suliarineqarsimanngitsut amerlassusaannik imaluunniit sullissinerup qanoq sivisutigisimaneranik naatsorsuisinnaasoqarsimanngitsoq."

Neriuutigineqarpoq, kommunini sullissisarnerup aaqqissuuteqqinneqarsimaneratigut suliassaqarfimmi ilisimasaqarnerulertoqarnissaa paasissutissaateqarnerulertoqarnissaalu.

Meeqqat kinguaassiuutitigut innarlerneqarsimasut pillugit nalunaarutit ikilisimasut

Nalunaarusiami aamma politiit meeqqat atugaannik takutitsisinnaasut kisitsisaataat ilanngunneqarsimapput.

Tassunga atatillugu nutaarsiassatsialaavoq, meeqqat kinguaassiuutitigut innarlerneqasimanerat pillugu nalunaarutigineqarsimasut 2020-miit 2021-mut ikileriarsimanerat. Tamanna skemami tulliuttumi takuneqarsinnaavoq.

Ajoraluartumilli meeqqat persuttarneqarsimasut pillugit nalunaarutit aamma angerlarsimaffinni meerartalinni eqqissiviilliortarnerit amerlanerulersimapput.

Powered by Labrador CMS