Killeqarfimmik nakkutilliineq pillugu isumaqatigiinnginnermi Kalaallit Nunaat ajugaasoq
Naalakkersuisut kimigiiserujussuarnerisa kingorna, aatsitassarsiorfimmi sulisut ilisimatuullu, Norgemi Svalbardimiit Kalaallit Nunaata Avannaanut Station Nordimut timmisartumik toqqaannartumik tikissinnaaqqilernissaat, qallunaat oqartussaasuisa siunniuppaat.
Danskit naalakkersuisui suleqatigiissitaliarisimasaata innersuussutigaa Station Nord Schengenreglerne killeqarfinni ikaarsaarfittut maleruagassat malillugit atorneqassasoq, Illersornissamut ministeriaqarfik tusagassiutinut taama nalunaaruteqarpoq.
Station Nordimi killeqarfimmik nakkutilliineq pillugu kalaallit qallunaallu akornanni piffissami sivisuumi isumaqatigiinngissutaasoq aaqqiissuteqarfigineqarsinnaalerpoq. Kalaallit Nunaata Avannaani sakkutooqarfik killeqarfittut ikaarsaariarfittut inissinnissaanut akuerineqarnissaa sulissutiginiarneqarpoq.
Danskit naalakkersuisuisa suleqatigiissitaliaata, ministeriaqarfinnit arlalinnit sinniisoqartup, Inatsisinillu Atuutsitsinermut ministeriaqarfiup siuttuuffigisaata, tamanna innersuussutigigaa, Illersornissamut ministeriaqarfik tusagassiutinut nalunaarummini allappoq.
Schengen malillugu maleruagassat
Station Nord nunatsinni killeqarfittut ikaarsaariarfittut nutaatut inissisimalissappat tamanna isumaqassaaq norskit qeqertaanni Svalbardimi Longyearbyenimiit toqqaannartumik tikiffigineqarsinnaalissasoq, tassa Schengen malillugit maleruagassaq pissutigalugu.
Naalakkersuisuni Aatsitassanut Suliffeqarnermullu Naalakkersuisoqm Erik Jensen nuannaarpoq. Ajornartorsiut pillugu danskit aaqqiissutissamik nassaarsimanerat nuannaarutigaa.
- Nutaarsiassaq ajunngilluinnarpoq, tamanna Naalakkersuisuni nuannaarutigaarput. Aqqut taanna pingaaruteqartorujussuuvoq, soorlu ingerlatseqatigiiffimmut australiameerumut Ironbarkimut, taakkumi inuit pingaaruteqartut aningaasaleerusuttullu Svalbardimiit toqqaannartumik Station Nordimut angallassinnaasariaqarpaat tassanngaanniillu Citronen Fjordimukarsinnaassallutik, ingerlatseqatigiiffimmi sumiiffimmi aatsitassarsiorniarluni pilersaaruteqarpoq. Station Nordip killeqarfittut ikaarsaariarfittut inissisimalernissaa ilimatuunut aamma pingaaruteqarpoq, Erik Jensen Sermitsiaq.AG-mut oqarpoq.
Suleqatigiissitap siunnersuutaa Inatsisinik Atuutsitsinermut ministeriaqarfimmit qinnutigineqareerluni Nunanut allamiunut Nunamilu akuutitsilernissamut ministeriaqarfimmit akuerineqassappat, tamanna isumaqassaaq angalasut Svalbardimiit Kalaallit Nunaata Avannaanut Station Nordimut timmisartumik toqqaannartumik angalasinnaaqqilissasut.
Sermitsiaq.AG-ip ilisimatinneqarnera naapertorlugu Inatsisinik Atuutsitsinermut ministeriaqarfiup qinnuteqaatini ullumi tallimanngornermi nassiutissavaa.
Unioqqutitsilluni nunamut iserneq
Sumiiffimmi angallanneq ukiuni arlalinni pisareersimagaluarpoq, Kalaallit Nunaatali Politiivisa sumiiffimmi angallanneq 2018-imi unitsippaatm Svalbardimiit Station Nordimut angalaneq unioqqutitsilluni nunamut isernerummat. Taamaaliornermut pissutaavoq station pineqartoq Schengen atorlugu killeqarfittut ikaarsaariarfiunngimmat. Tunngavilersuutigineqartut Naalagaaffiup Politiivinit Inatsisinillu Atuutsitsinermut ministeriaqarfimmit ilalerneqarpoq. Suleqatigiissitap siunnersuutaa pissutigalugu qaammatini arlalinni isumaqatigiinngitsoqareersorlu allatut suleriartoqarnialerpoq.
Nunap nunarsuup allorniusaani aalajangersimasumi inissisimanera pissutigalugu Tunullu Avannaani inuttussuseq eqqarsaatigalugu, sumiiffimmi politiit oqartussaanerat Issittumi Sakkutooqarfimmi suliaqartuni akisussaaffigineqarpoq. Taamaammat Station Nord killeqarfittut ikaarsaariarfittut inissisimalissappat, Illersornissaqarfimmi suliaqartut politiinit ilinniartinneqareernerup kingorna, sumiiffimmi killeqarfimmik nakkutilliisuulissapput, Illersornissamut ministeriaqarfik ilisimatitsivoq.
Killeqarfimmik nakkutilliineq pillugu aaqqiagiinnginneq arlalinnut unammillernarsimavoq. Ingerlatseqatigiiffik Ironbark australiameersoq, danskit ilisimatusarfii arlallit, soorlu Aarhus Universitet aamma DTU kiisalu tyskit ilisimatusarfiat Alfred Wegener-instituti.
Aviisip Sermitsiap siornatigut allaaserisimasaatut Naalakkersuisup Erik Jensenip kissaatigilluinnarpaa Svalbardimiit Station Nordimut timmisartukkut angallassinerit ammaqqinneqarnissaat, taamaasiornikkut Ironbark ilisimatusartullu Station Nord aqqutigalugu akikinnerusumik ajornaannerusumillu angalasinnaaniassammata.
Oqartussat nersualaarneqarput
- Danskit oqartussaasui uagutsinnut tusarnaarsimammata nersualaarusuppagut. Svalbardimiit Station Nordimut nunamut isersinnaanerup angunissaanut kimigiisersimanerput iluaqutaavoq. Naalakkersuisuniilli kalaallillu folketingimi ilaasortaatitaannit qallunaat oqartussaasuinut kimigiisernissaq pisariaqarsimavoq, aporfeqarnerummi kingunerisaanik Kalaallit Nunaata Avannaani aatsitassarsiornissamut aningaasaliisussat qimaatinnginnissaat pisariaqarmat. Tamanna kinguneqarluarpoq, nuannaarutigaarpullu, Erik Jensen erseqqissaavoq.
Illersornissamut ministeriaqarfiup naatsorsuutigaa nunatsinni killeqarfimmik ikaarsaariarfeqalernissamut qinnuteqaat Nunanut allamiunut Nunamilu akuutitsilernissamut ministeriaqarfimmit suliarineqareerluni aasaanerani sulinngiffeqarfik nallertinnagu naammassineqassasoq.