Killavaat Alannguat: Pissaanillit akuliunnissamut piareersimapput
Kinamiut Killavaat Alannguanni aningaasaliissutaat sunniuteqarnerallu USA-mit nakkutigeqqissaarneqarput. Kina peqataatinneqassappat Amerikamiut mineralinik qaqutigoortunik piiaanissamut immaqa akornusersuilersinnaapput, illersornissamut immikkut ilisimasalik Peter Viggo Jakobsen oqarpoq.
Kinamiut Nunatsinni sunniuteqarsinnaanerannut USA-p ernummateqarnera, Killavaat Alannguanni mineralinik qaqutigoortunik piiaanissaq akornusersorsinnaavaa imaluunniit kinguarsarsinnaallugu.
Illersornissamut immikkut ilisimasalik, ph.d. aamma Københavnimi illersornissamut ilinniarfimmi lektoriusoq Peter Viggo Jakobsen taama isumaqarpoq, AG allappoq.
Tassami Kina mineralinut qaqutigoortunut annerusumik minnerusumilluunniit kisermaassilluni ingerlatsisuuvoq. Kinamiut teknologimut pingaarutilimmut aningaasarsiornermullu ingerlatsisuupput. Taamaattumik Tanbreezimut piginnittumut Australiamiumut Greg Barnesimut, Killavaat Alannguanni piiaasinnaanermut qanittukkut akuersissummik pissarsisumut, Kinap avaqqunnissaa ajornakusoortorujussuanngorsinnaavoq.
Kinap sunniuteqarpallaarnera ernumagineqarpoq
Piiaanissamut pilersaarummut Narsap Qaqortullu akornanniittumut, Kinamiunik aningaasaliisoqassagaluarpat imaluunniit Kinamiut angisuumik sunniuteqalissagaluarpata, tamanna USA-mut ernumanarsinnaavoq, taamaalilluni Amerikamiut – ammasumik isertorlutilluunniit – pilersaarut kinguarsarniarsinnaavaat. Imaluunniit pinngitsoortissinnaallugu, Peter Viggo Jakobsen isumaqarpoq.
- Kinamiut Nunatsinni aningaasaliissuteqarniarnerat USA-p ernumanartoqartikkaluttuinnarpaa. Kinamiut ingerlatseqatigiiffiannut mittarfiliornernullu atatillugu tamanna takuarput. Mineralit qaqutigoortut elektronikinut pingaarutilinnut tamanut atorneqartarput aamma sakkussiornernut. Taamaattumik Amerikamiut Kinap sunniuteqarpallaarnera ernumanartoqartippaat.
- USA-p Kina akerarinerpaasamisut isigigaa oqartoqarsinnaavoq. Amerikamiut mineralit qaqutigoortut isumannaatsuunissamut siornatigut akuliuttanngikkaluarpaat. Ullutsinnili taamaaliorlutik. Kinami suliffeqarfiit Kinamilu naalagaaffik qanittumik suleqatigiipput, naalagaaffillu suliffeqarfinnut aningaasatigut tapersersuinissaminik tunuarsimaanngimmat, suliffeqarfiit nunani killerniittut mineralinik qaqutigoortunik aningaasarsiorsinnaanerat ajornarluinnarluni. Nunat killiit taamaalillutik ingiarneqartarlutik, Peter Viggo Jakobsen oqarpoq.
Allaaserineqartoq aviisimi AG-mi tamakkiisumik atuarneqarsinnaavoq. Aviisi uani pisiariuk: