Kilisaatit apornerisa kingorna: Umiarsuup naalagaa aquttualu politiinit killisiorneqartut
Kilisaatit nunatsinneersut marluk Maniitsup kujataani arfininngornermi unnukkut imminnut aporput. Kilisaatit sapaammi Nuummut tikipput, politiillu inuttasunik killisiuinermik saniatigut ajoqusikkanik misissuillutik.
Kilisaatini marlunni arfininngornermi unnukkut Maniitsup kujataani imminnut aportuni siulleq ullaaq arfineq-marluk missaanni Nuummut talippoq. Taanna tassaavoq Royal Greenlandip kilisaataa Akamalik.
Polar Seafoodip kilisaataa Polar Nataarnaq nalunaaqutaq 9.30 missaanik tikippoq.
Taama Kalaallit Nunaanni Politiini pigaartut ittuat, Jens Rønberg, paasissutissiivoq.
Taanna oqaluttuarpoq, politiit Akamaliup naalagaanik aquttuanillu killisiuiartorsimasut.
- Killisiuinerit umiarsuarmilu ajoqusikkanik misissuinerit ingerlappavut.
Imarsiornermut aqutsisoqarfik misissuissasoq
Illuatungeriit oqaloqatigineqareertinnagit apornermut suna pissutaasimanersoq Kalaallit Nunaanni politiinit isumaliutersuutigiumaneqanngilaq.
Suliaq kingusinnerusukkut Imarsiornermut Aqutsisoqarfimmut tunniunneqassaaq. Tassani assingusunik allanillu suliassaqarfigisap iluaniittunik aamma misissuisoqassaaq. Imarsiornermut maleruagassat tamarmik malinneqarsimanersut aamma kilisaatini ajoqusikkat imarsiortut nassuiaataannut naapersuunnersut.
Kalaallit Nunaanni Politiinit aammaarluni erseqqissaatigineqarpoq, inunnik ajoqusertoqarsimasinnaaneranik nalunaarfigineqarsimanatik.
Jens Rønberg maannamugallartoq ajoqusikkat annertussusiinik ersarissumik nalunaaruteqarnissamut periarfissaqannginnerarpoq, ataaserli qularnaappoq: Kilisaatit Maniitsup kujataaniit Nuummut namminneq ingerlasinnaasimapput.