Kilisaatip ikuallannerani pinerluttoqarsimanngilaq
Kilisaat sapaatip akunnerata siuliani ikuallattoq pillugu politiit paasiniaallutik takunnittunik killisiuinertik naammasseqqammerpaat. Suliami pinerluttoqarsimanngitsoq Kalaallit Nunaata Politiivinit ilimagineqarpoq.
Ataasinngorneq 16. marts nalunaaqutaq 19.00 missaani kilisaammi Polar Aassimmi ikuallattoqarneranik politiit kalerrinneqarput.
Ikuallattoq sakkortusisarlunilu pujuliornerinnanngortarpoq, naggataatigulli kilisaat Qasigiannguit kujataatungaani kivivoq. Inuttat qulit tamarmik nunamut ikaarunneqarsinnaasimapput.
Kalaallit Nunaata Politiivisa ikuallattoqarneranit misissuisinnaasimanngillat kilisaat kivinikuummat. Taamaattoq inuttat killisiorneqarsimasut, politiini attaveqatigiinnermik suliaqartut ilisimatitsipput.
- Killisiuinerit naapertorlugit ikuallanneq atortutigut ajutoortoqarsimaneranit aallaaveqartoq ilimagivarput. Taamaammat ilimagivarput ikuallattoqarnerani pinerluttoqarsimanngitsoq, politiit ilisimatitsipput.
Avatangiisinut tunngasut Arktisk Kommandop suliarissavai
Kilisaatip kivinerata kingorna Arktisk Kommandop avatangiisit mingutsinneqannginnissaannik suliaqartussanngorpoq. Kilisaatip kivineranit ullut tullii kilisaat orsussamik erngarsimavoq.
Arktisk Kommandomit kingullermik nalunaartoqarmat orsussaq annikinnerusoq kuussimavoq, tassa tallimanngormat.