Kilisaatip ikuallannera qamikkuminaatsinneqartoq
Kilisaatip Polar Aassiup ikuallannera qatserisartut qamikkuminaatsikkaat, Nuummi politiit ilisimatitsipput. Inneq qamilersoriniarlugu naarallaqqittarpoq. Tamanna sapaatip ataasinngornerullu akornanni kilisaat ikuallalermalli arlaleriarluni pisarsimavoq.
Kilisaat Polar Aassik Qasigiannguit eqqaann sapaatip ataasinngornerullu akornanni ikuallalersimasoq qamikkuminaatsinneqarpoq.
Brian Thomsen Nuummi politiineersoq Politiinit, Qatserisartunit, Issittumi Sakkutooqarfimmit Avatangiisinullu Naalakkersuisoqarfimmit immikkut suliaqartitanut ataqatigiissaarisuusoq taamatut oqaluttuarpoq.
Siku akorngutaasoq
Kilisaat Qasigiannguit avataani ikuallattoq imaaliinnaq qaminneqarsinnaanngilaq. Polar Seafoodip kilisaataataa ukiunik 33-nik pisoqaassusilik ikuallalermalli inuttallu qimagutsinneqapallammatali sumiiffimmi siku akorngutaasimaqaaq, pissutsilli marluk annaanneqarsinnaasut annaanniarneqarneranni iluaqutaasimapput.
- Qujanartumik sila atoruminarsimavoq. Aamma qujanartumik angallatip kilisaataata ninginneqarsimanera iluaqutaasimavoq, tamatumami malitsigisaanik angallat arriinnerusumik tissukartarpoq ilaatigullu aqunneqarsinnaanngitsumik tissukarsinnaajunnaarluni immap naqqanut naatittarluni, Brian Thomsen Nuummi Politeeqarfimmi aqutsisoqarfimmiit ilisimatitsivoq .
Nikinnaveeqqasoq
Kilisaat maannakkorpiaq nikinnaveeqqavoq, ulittarnerali tinittarneralu aamma anori apeqqutaallutik angallat tissukaqqilersinnaavoq.
Brian Thomsenip ilisimatitsissutigaa, qatserisartut angallammi ikuallanneq imermik serpartarlugu qamisarniarlugu suli tikivissinnaasimanngikkaat.
- Ikuallattoq aqussinnaanngilarput, nammineerluni qaminnissaa naatsorsuutigineqarpoq. naarallaqqittarnissaali ilimanarluni, Brian Thomsen oqarpoq.
Issittumi Sakkutooqarfimmit alapernaarsuut Knud Rasmussen sumiiffimmukartinneqarpoq, umiarsuulli qaqugu kilisaammut 499 bruttotonsiusumut aamma 33,5 meterisut takitigalunilu 10,4 meterisut silitsigisumut apuunnissaa qulakkeerlugu oqaatigineqarsinnaanngilaq. Siusinnerusukkut oqaatigineqaraluarpoq, Knud Rasmussen ualimut tallimat missaanni apuutissasoq.
Innuttaasunut piumasaqaat
Politiit marlunngormat unnukkut Qasigiannguani innuttaasut qanillinaveersaarnissaannik piumasaqarfigivaat.
- Qatserisartut politiillu nunami immamilu ulapipput, innuttaasullu inissaqartitsisariaqarput, politiit marlunngormat unnukkut kaammattuuteqarput.
Ataasinngormat unnukkut nalunaaqutaq 19.03 politiit Aasiaat Radioanit nalunaarfigineqarput.
Brian Thomsenip Nuummi politiineersup ilisimatitsissutigaa, ikuallannermut suna pissutaanersoq arlaannaannilluunniit ilisimaneqanngitsoq. Inuttat qulit ajoqusersimanngitsut annaanneqarsimapput.