Kilisaataatillit RAL pillugu: Atuisoq eqqortuutinneqanngisaannarpoq

Raajarniartut kilisaataatileqatigiiffiit angisuut, assartukkat pillugit ineriartorneq oqaluuseriniarlugu pingasunngornermi Sulisitsisuni ataatsimiipput.

Kilisaataatileqatigiiffiit uku isornartorsiuipput:

Niisa Trawl ApS, Sikuaq Trawl A/S, Qajaq Trawl A/S, aamma Polar Seafoodip suliffeqarfissua.

Sapaatip-akunnerata aallartinnerani Royal Arctic Linep avammut assartukkanut akigititat 32 procentinik qaffanneqarnissaat nalunaarutigaa, tamannalu umiarsuaatileqatigiiffiit sakkortuumik isornartorsiorpaat.

- Aarhusimi pingaarnertut talittarfeqalerneq Verner Hammekenip pitsaalluinnarneragaa iluatsinngilluinnarpoq. Uagutsinnut atuisunut ajornannginnerusoqalinngilaq – akerlianik Kalaallit Nunaannit assartuititsineq akisunerulerpoq, kilisaataatileqatigiiffinnik piginnittut Sermitsiaq.AG-mut nalunaaruteqarput.

RAL-ip Danmarkimi aallaavittut talittarfeqarneq Aalborgimit Aarhusimut nuunniarlugu juunimi siorna atulersitsilluni aalajangerneranut tassani innersuussilluni oqariartuuteqartoqarpoq.

Akit ukiorpassuarni attanneqarsimasut

Assartuinermut akigititat ukiorpassuarni qaffanneqarsimanngitsut, uani sapaatip-akunnerani akinik qaffaanermut atatillugu Verner Hammeken oqarpoq. Umiarsuaatileqatigiiffiilli tamanna isumaqatigivallaanngilaat.

- Assartuinermut akit qaffannikuunngikkaluarput, kisianni akerlianik nutaanik amerlasuunik akitsuusersuisoqarnikuuvoq, umiarsuaatileqatigiiffiit isumaqarput.

RAL-imi kiffartuussinernut assigiinngitsunut suut akilerneqartassanersut takujuminaallisimasoq, taakku oqaatigaat.

- Verner Hammeken RAL-imi atorfinimmat suliffeqarfik ingerlalluarpoq. Atorfinereernerata kingorna ammuinnaq ingerlavoq, maannalu ingerlatsinerlunnerata akinik qaffaasoqarnera maanna uagut akilertussanngorparput, suliffeqarfimmik ingerlatsilluarnerput pissutigalugu. Atuisut eqqortuunngisaannartut isumaqarpoq. RAL-ip kiffartuussineranik naammagisimaarinnittunik ilisimasaqanngilagut. Kisermaassineq pissutigalugu suliffeqarfimmik taamatut ingerlatsisoqarsinnaavoq, taama isornartorsiuipput.

Kisermaassineq pissutigalugu

Akit manna tikillugu containerit assartorneqarnerinit appasinnerujussuarmiissimagaluartut, Verner Hammekenip akerlianik akit qaffanneqarnerinut nassuiaateqarpoq.

Akit qaffanneqarneri Verner Hammekenip aamma Naalakkersuisup Erik Jensenip oqarnerisa akerlianik nunatta karsiani innuttaasunilu malugineqarsinnaassasut, umiarsuaatileqatigiiffiit oqaatigaat.

Kilisaatini sulisut akissarsiakinnerulernerannik qaffaaneq ilaatigut kinguneqassaaq, assartuinermut aningaasartuutit akissarsiat tunniunneqannginnerini ilanngaatigineqartarmata. Nunatsinni sulisartut 10 procentiinit amerlanerulaartut aalisaarnerup iluani suliaqarput, taakkunanngalu akileraarutitigut isertitat annikinnerungaatsialissapput.

Nunap karsianut akisussasoq

Tamatuma saniatigut ingerlatseqatigiiffiit minnerusumik sinneqartooruteqalissapput, assartuinermut saniatigut aningaasartuuteqarnerulerunik aningaasanik allatigut aallerfissaqannginnamik. Kalaallit suliffeqarfii aalisakkanik raajanillu tuniniaasartuni kisartaanngillat, inuussutissanik suliffissuit allat unammillertigaat, akinillu qaffaasinnaanatik.

Taamaattumillu nunap karsianut ingerlatseqatigiiffimmit akileraarutit ikinnerulersinnaapput, Naalakkersuisullu nunatsinni inuussutissarsiutit pingaarnersaannut taama annertutigisumik akinik qaffaanermik akuersissuteqarnerat umiarsuaatileqatigiiffiit paasisinnaanngilaat.

- Qaffariaat 2-3 procentiugaluarpat naammagittaalliutiginagu akuerisimassagaluarparput, kisianni killissamik qaangeerujussuarneruvoq.