Hanseeraq Enoksen, Sisimiuni suliffeqarfiutilik inuiaqatigiinnut sunniuteqarluartuunini pillugut Inatsisartunit nersornaaserneqarpoq. Inatsisartut siulittaasuata, Kim Kielsenip Nersornaat kuultiusoq Sisimiuni nalliuttorsiorpalaartumik katerisimaarnermi tallimanngornermi 15. september tunniuppaa.

LÆS OGSÅ: Kilisaat nutaaq Sisimiunut

- Hanseeraq Enoksen, taamatut nersorniarneqarputit ukiorpassuarni angusaqarluarlutillu kilisaataatileqatigiiffimmik, suliffeqarfimmik annertuumik peqatigitillugulu ilaqutariippassuarnut, najukkami innuttaasunut minnerunngitsumillu Qeqqata Kommunianut isertitaqartarnikkut tunngaviulersimasumik pingaarutilimmik, ingerlatsisimanerit pissutigalugu, Inatsisartut siulittaasuat Kim Kielsen nersornaammik tunniussinermi oqaaseqarpoq.

Inuussutissarsiorneq pingaaruteqarluartoq

Inatsisartut siulittaasoqarfia aalajangersimavoq Hanseeraq Enoksen nersornaaserneqassasoq inuussutissarsiornermik ingerlatsinermini inuiaqatigiinnut sunniuteqarluartuunera pillugu.

- Suliffeqarfik ilissi suliffeqarfissitut annertutigisoq najukkami innuttaasunut peqqinnarpoq, suliffeqarfissinnilli ingerlatsisinnaanissinnut piumasaqaatit naammassiniarlugit tamanna aamma soorunami kommunimut piumasaqaatitaqarlunilu kommunimit paasineqartariaqartunik. Maluginiagassaavortaaq ilaqutariittut suliffeqarfiutersi inuussutissarsiutip iluani suliffeqarfinnit allanit pisiarineqarsimanngimmat, soorlu aamma aqqutinni ajornartorsiutinik naapitaqartarsimagaluarlutit qasusuillutit kommunimi suliffeqarfinnik ingerlatsinerit ingerlatiinnarsimagit, Kim Kielsen oqarpoq.

LÆS OGSÅ: Direktør Hanseeraq Enoksen får hæderspris

Hanseeraq Enoksen Sisimiuni kilisaataateqarfimmik Angunnugaq A/S-imik ingerlatsisoq namminersortutut siorna ukiunik 25-nngortorsiorpoq.

Taanna Inatsisartut siulittaasoqarfiannit Nersornaammik sølviusumik siusinnerusukkut tunineqarsimavoq.