Kilisaat raajarniut nutaaq singinneqartoq
Ice Trawl Greenland kilisaammik raajarniummik nutaamik sanatitsileruttorpoq, aappaagu ukiakkut naammassisussamik aamma Kalaallit Nunaata Svalbardillu eqqaanni aalisartussamik.
Ice Trawl Greenlandip Sisimiuni aallaaveqartup, umiarsuartaassani nutaaq, Nataarnaq, kilisaataatileqatigiiffiup ullumikkut kilisaataataanut taama atilimmut taartaasussaq, singeqqammerpoq.
Singitsineq Spaniami Bilbaomi umiarsualiorfimmi Asterillos Muruetami tallimanngornermi aggustip 21-ani pivoq. Singitsineq corona pissutigalugu Kalaallit Nunaannit peqataaffigineqanngilaq, maskinmester Asbjørn Petersen, kilisaataatileqatigiiffik sinnerlugu sanaartornermik nakkutiginnittoq, eqqaassanngikkaanni. Corona pissutaalluni sanaartorneq qaammatinik kinguaattoorsimasoq, Ice Trawl Greenlandip siulersuisuisa siulittaasuat, Ove Rosing Olsen, paasissutissiivoq.
– Kilisaat raajarniut nutaaq 82,30 meterinik takissuseqarluni ullumikkut Nataarnat 67,50 meterinik takissusilimmit angineruvoq, taamaallaallu raajarniassalluni Kalaallit Nunaata imartaani kiisalu Svalbardip eqqaani, Rosing Olsen aviisimut Sermitsiamut paasissutissiivoq.
Sisimiuni atserneqassasoq
Singitsisoqarnerata kingorna umiarsualiorfimmi sulineq ingerlaqqippoq. Nataarnap 2021-mi ukiakkut naammassiguni Sisimiuni atserneqarnissaa pilersaarutaavoq.
Tamatuma peqatigisaanik Ice Trawl Greenlandip ukiunik 30-liilluni nalliuttorsiorneranik malunnartitsiniarnerussaaq.
Allaaserineqartoq aviisimi Sermitsiami tamakkiisumik atuarneqarsinnaavoq. Aviisi uani pisiariuk: