Kiista: Qineqqusaarnerit ataatsikkoortut iluaqutitaqarlutillu ajoqutitaqarput
Kommunit suliassaqarfiit Inatsisartunut kommuninullu qineqqusaarnerit ataatsikkut ingerlanneqaraluartut innuttaasunut anngulluarsinnaapput. Kisianni taava qineqqusaarnissaq pilersaarusioqqissaarneqartariaqarput, Kommune Kujalliup borgmesteria erseqqissaavoq.
Qineqqusaarnerit qaqugukkut kommuninut qaqugukkullu Inatsisartunut tunngasuunerat innuttaasut ilisimaqqissaartariaqarpaat.
Taama Kommune Kujalliup borgmesteri, Kiista P. Isaksen (S), isumaqarpoq, apriilillu 6-ani qinersinissanut marlunnut ataatsikkut qineqqusaarnissaq iluaqutitassaannik ajoqutitassaannillu takunnissinnaanerarluni.
- Iluaqutissartaa tassaavoq, qinersisartut kommunini suliassaqarfiit nunalu tamakkerlugu suliassaqarfiit suunerannik ilisimasaqarlualernissaat. Ajoqutissartaali tassaavoq innuttaasut qineqqusaarnernut marlunnut malinnaanermikkut politikkimik qatsussisinnaanerat. Taamaattumik qineqqusaarnissat pilersaarusioqqissaarneqartariaqarput, ulloq qinersiviusussaq tikillugu soqutiginninneq attanneqarsinnaaqqullugu, Sermitsiaq.AG-mut oqarpoq.
Nittartakkat attaveqatigiittarfiit
Coronamik killilersuinerit pissutaallutik qineqqusaarnermi nittartakkat attaveqatigiittarfiit atorneqarnissaat pisariaqassaaq.
- Qinigassanngortittut killilersuinerit pissutigalugit nunaqarfinnut angalanissamut sunik periarfissaqarnissaat ilisimanngilarput. Taamaattumik qineqqusaarnermi inuiaqatigiit sungiullursimasaannik, Facebookimik, atuinissaq eqqarsaatigaara. Tassanngaanniillu qinersisartunik ataatsimiititsinerit saniatigut oqariartuutikka aamma ingerlateqqittarniarpakka, Kiista P. Isaksen erseqqissaavoq.
Siuariartortitsinissamut periarfissat
Kommune Kujalliup borgmesteria naapertorlugu qineqqusaarnermi Kuannersuarni suliniutip saniatigut sammisat arlallit qineqqusaarutigineqassapput.
- Kommunitsinni siuariartortitsinissamut periarfissaqarluarpoq, kisianni unammilligassaqarnerput aamma eqqarsaatigisariaqarparput. Taamaattumik siunissami ukiunut qulinut pilersaarusiornissaq pisariaqarpoq, sumik sammiveqarluta ingerlaniarnerput innuttaasunit ilisimaneqarsinnaaqqullugu. Kisianni sukarsuarni siuariartortitsisuusuni sisamani, aalisarnermi, takornariaqarnermi, aatsitassarsiornermi nunamilu inuussutissarsiutini siuariartortitsisoqassaaq, tamannalu qineqqusaarnermi sammineqartorujussuussaaq, Kiista P. Isaksen oqarpoq.
Kommuninut qinersinermi kingullermi borgmesteritut qinigaavoq, 456-init taaguunneqarsimalluni.