Kiista P. Isaksen: Kujataani angallannikkut ajunaarnersuaqarpoq

Naalakkersuisut piaartumik Disko Line iliuuseqarfigisariaqaraat, Kommune Kujallermi borgmesteri oqarpoq.

Ullumikkut apriilip ulluisa 12-iani Disko Linep Kujataani angallassinermut ullaatungaani paasissutissiinera takugaanni paasissutissat tujorminartut takusassaapput:

Aviaq Ittuk ullaatungaani ima nalunaaruteqarpoq: Sikorsuaqarnera silalu pissutigalugu imaatigut angallassinerit tamarmik taamaatinneqarput. Allatut angallassisoqarsinnaanera sulissutigaarput, nutaarsiassaqalerpallu angalasut toqqaannartumik tamarmik attavigineqassapput.

Angallatit marluk Targa Express-1 aamma Targa Express-2 aamma taamatut nalunaaruteqarsimapput.

Qulimiguulik ataasiinnaaq

Taamatut nalunaaruteqarnerit Kommune Kujallermi borgmester Kiista P. Isaksen (S) Kujataani angallannermi pissutsit pillugit Naalakkersuisunut kaammattuuteqarpoq.

- Ajorpoq, ajuuvippoq! Kujataani qulimiguulik ataasinnaatinneqarpoq, imaatigut angalaniarsarineq pisariusorujussuuvoq, allaat ilaasussat pitsorluttut innarluutillillu illersorneqarsinnaanngitsumik angallanneqarput.

Qineqqusaartut nikeriarneq ajuleqqasimasut

Qineqqusaartut Kujataani qineqqusaartunik ataatsimiisitsinermut atatillugu angallanngerup qanoq ajornartorsiutaatiginera nammineerlutik misigaqarfigaat. Kim Kielsenilu Qaqortumi angallanneq pissutigalugu tv-kkut qineqqusaartunik ataatsimiisitsineq aamma peqataaffiginngitsoorpaa. Taassuma pilersaarutit malillugit oqallinneq peqataaffigisussaangaluarpaa.

- Maanna ulluni makkunani kingumut uppernarsineqarujussuaqqippoq illersorneqarsinnaanngitsumik angallannikkut kiffartuunneqartugut, sassartullumi
namminneq uppernarsivaat Kujataani angallannikkut pissutsit qanoq ajorluinnartiginersut, Kiista P. Isaksen (S) allappoq.

Allamik qulimiguuliisoqarnianngitsoq

Qanoq iliortoqarsinnaanera borgmesterip misissorsimangaluarpaa, iluatsitsinanili.

- Angallannikkut pissutsit naammaginanngilluinnarmata Disko Line A/S-imut paasiniaagaluarama qulimiguulik aapperneqassanersoq ilisimatinneqarpunga tamanna pilersaarutigineqanngitsoq, patsisigineqarluni Air Greenland A/S-inngooq qulimiguullik
Qeqertarsuup tunuani atussammagit.

Tamanna tunngavigalugu isumaqarpoq, Diskoline pisussaaffimminik naammassinninngitsoq, Naalakkersuisullu iliuuseqaqqullugit kaammattuilluni.

- Ajorluinnartumik pisoqarsiinagu massakkorluinnarlu Naalakkersuisut Disko Line A/S-imut piumaffiginnittariaqarput ilaasunik angallassinermut kiffartuussinissaq pillugu
isumaqatigiissutini naapertorlugu angallannikkut pisussaaffimminik
naammassinnittariaqartoq!

Powered by Labrador CMS