Nunarsuarmi kingornussassat

Kiista: - Nuannaaqaagut!

Kujataani nunaateqarfik nunarsuarmi kingornussassanut ilanngutsinneqarnera Kommune Kujallermi borgmesterip tulluusimaarutigaa

Kiista P. Isaksenip (S) iluatsinnissmut aallaqqaammulli neriulluarsimavoq.

Tulluusimaarneq suli tusaaneqarsinnaavoq.

Naak Krakow-imit oqarasuaatikkut attaveqaatingiikkaluarluni, qularutissaanngilaq borgmesterip nuannisaarpalunnera.

- Nuannaaqaagut, Kiista P. Isaksen (S) nunarsuarmi kingornussassanut ilanngutitsineq akuerineqarluni atuarneqaranera pillugu oqarpoq.

Ukiuni 15-ni sulinerup inernera

Ataatsimiititaliarsuup isumaqatigiilluinnarluni kangerluit ilaat tassa Igalikup Kangerlua Tunulliarfillu UNESCO-p nunarsuarmi kingornussassaata akornanniilernissaat akueraa.

Kiista P. Isaksenillu (S) UNESCO-p Nunarsuarmi kingornutassanut ataatsimiititaliarsua Krakow-imi Polenimi ataatsimiinneranut peqataajartorluni aallaramili neriulluarfigisimavaa.

- Aallaqqaammulli iluatsikkumaartoq qularisimanngilara, kisiannili qularnartoqalaartuaannarluni, taanna oqarpoq.

Kommune Kujallermit aallartitat tamatuma pinnginneranili nunat ataasiakkaat nunarsuarmi kingornussassanut ilanngunneqartussatut siunnersuutit qanoq inneri misissuataarsimavaat. Siunnersuutigineqartulli skærmersuakkut saqqummiunneqarput kingornalu nunat apeqqutigineqarfigineqarsinnaasimallutik.

- Ilaat ingerlalluartut ilaallu ingerlalluarpallaanngitsut takusinnaasimavarput, Kiista P. Isaksen (S) annikitsumik qularneq pillugu oqarpoq.

Kujataanilu piffik saqqummiunneqarneraniilli ingerlalluarneq malugisinnaasimavaa.

- Pinngortitarsuatsinnimi assit saqqummiunneqartut takullugit assut isumallualersimavunga.

Apeqquteqaateqareertoqarnerali kingorna nuannattoqarsinnaalerluni.

- Iluatsikkatsigut assut tulluusimaarutigeqaarput, taanna oqarpoq.

Takornarialerinermik periarfissat

Nuannattoqareerneratali kingorna Kujataani sulineq aatsaat aallartinneqassaaq.

- Massakkut sulineq aatsaat aallartissaaq. Nunarsuarmi kingornussassatut akuerineqarneq pisussaaffiliivoq, Kiista P. Isaksen naqissusiivoq.

Taassuma qularutiginngilluinnarpaa Ilulissat kangerluata saniatigut piffimik allamik nunarsuarmik kingornussassanut ilanngussineq najukkami taamaallaat pinnani kisianni Nunatsinni takornarialerinermut iluaqutaajumaartoq.

- Qanoq pisoqarnissaanik massakkut pilersaarusiussaagut. Tamanna assut qilanaarivarput, Kiista P. Isaksen oqarpoq.

Aamma atuakkit:

Powered by Labrador CMS