Kiista Kujataani ukiunut qulinut atuuttussamik pilersaarusiorniarpoq

Kiista P. Isaksen kujataata kommunia erseqqissunik siunnerfeqarniassammat ukiunut qulinut atuuttussamik pilersaarusiorniarpoq. Siumut sinnerlugu borgmesteriusup apriilip arfernani kommunimut qinersisoqarnissaa sioqqullugu taamatut nalunaaruteqarpoq. Siumumilu politikkerip qinigaaqqissaguni suliniutiginiagaasa tamanna ilagiinnarpaat.

Kommuni Kujalermi ukiunut qulinut pilersaarut timersortarfissuartaarnissamik, tikeraat saaffiginnittarfeqalernissaannik kulturikkullu illorsuartaarnissamik takoorluukkanik ilaatigut imaqarpoq, Kiista P. Isaksen oqarpoq.

Erseqqissaatigaali qinerneqqaqqeqqaartariaqarluni. Ukiut sisamat kingulliit ingerlaneranni aallartitseqataaffigisimasani naammasserusuttorujussuuai.

Kalaallit Nunaata siunissaa

- Kujataa Kalaallit Nunaata siunissaraa, nunallu immikkoortortaata tamatuma ineriartortinneqarnissaanut peqataarusuppunga, Kiista P. Isaksen Sermitsiaq.AG-mut oqarpoq.

Qineqqusaarnermi samminiarpai, innuttaasut ikiliartornerisa ilutsittumik unitsinneqarsimnera aamma tulliullugit taagorneqartut aqqutigalugit qinigaaqqinnissani kissaatigaa:

Inissiat pitsaanerusut

Meeqqeriviit atuarfiillu pitsaanerusut

Inuussutissarsiortut pitsaanerusumik atugaqarnissaat

Isumaginnittoqarfimmi sulineq pitsanngorsaaffigineqassaaq sullissisut piginnaasaqarnerisa qaffassarneqarneratigut.

- Pitsaasumik ineriartortoqarnissaanik kissaateqartoqaruni partii Siumut taaneqartariaqarpoq. Ukiuni sisamani kingullerni missingersuutit neriartortitsilluarsimapput. Sanaartorneq uninngasimasoq - uagut aqutsinitsinni - aallarteqqinneqarpoq, borgmesteri oqarpoq.

- Inuussutissarsiortut atugaat pitsaanerulersinniarlugit Innovation South Greenland, inuussutissarsiortunik siunnersuillunilu ilitsersuisartussaq pilersissimavarput. Nunaqarfinnik inerisaanissaq pilersaarusiorparput, innuttaasunik peqataatitsilluta. Aamma meeqqat inersimasullu toqqissisimallutik najugaqarnissaat anguniarlugu suliniuterpassuit allat naammassillugit suliarisimavavut. Taamaammat unneqqarissumik pitsaasumillu ineriartortitsineq aqutsinerlu tapersersoraanni uanga parteeralu taaneqartariaqarpugut, Kiista P. Isaksen ”nunaqarfimmi illoqarfimmiluunniit najugaqaraluaraanni inummik qitiutitsiniartoq” oqarpoq.

Peqataatitsisarlunilu tusarnaartuusoq

Borgmesterip oqaatigaa, peqataatitsisarluni aamma innuttaasut isumaannik tusarnaartarluni.

- Innuttaasummi tamarmik tunniussassaqarput. Taamaammat peqataatitsisarneq suliaqarnermi sakkutut pitsaasutut isigaara, tamannalumi tamatta atugaaraarput, taanna qineqqusaarnermi inuit attaveqaqatigiittarfiannik atuilluarniartoq oqarpoq.

Qineqqusaarnissap aallartinneqarnissaanut qaammatialuinnanngortut Naalakkersuisut Inatsisartunilu politikkerit kujataani kommunimik ineriartortitseqataanissaat kissaatigaa. Tassunga atatillugu Qaqortumi timmisartoqarfissaq initoorujussuuvoq, oqaatigaalu timmisartoqarfissaq naammassillugu suliarineqartariaqartoq, Qaqortup Narsallu akornanni aqquserniortoqartariaqartoq aamma Nanortalimmi mittarfiliortoqartariaqartoq.

Suliassat allat pingaarutillillu pilluti borgmesteri Nuummi qitiusumik aqutsisunit kiorserneqarusuppoq:

Aatsitassarsiorfissap Nalunap aallartinneqarnissaanut

Namminersorlutik Oqartussat suliffeqarfiutaannik Kujataanut nuussinissamut

Inissianik sanaartornissamut

Ataatsimoortumik tapiissutit nalimmassarneqarnissaannut

Isumaqarpoq naalakkersuisoqarfinnik suleqateqarneq ”arlalippassuartigut pitsaasuusoq, naalakkersuisoqarfiilli ilaannik suleqateqarneq ptsaanerusariaqartoq”, taanna suleqatigiinnerup sukkut ajornartorsiuteqartarneranik nassuiaateqarani oqarpoq.

Kujataata kommuniani kommunalbestyrelsi 13-inik ilaasortaatitaqarpoq. Taakkunannga arfineq-marluk Siumuminngaanneerlutik, taamalu amerlanerussuteqarluarlutik.

Ilaasortat agguataarsimanerat

Siumut:

Kiista P. Isaksen

Simon Simonsen

Monica Dorph

Karla Egede Bisgaard

Benjamin Kielsen

Mari S. Aberlsen

Anders Olsen

Inuit Ataqatigiit

Henrik Brummerstedt

Stine Egede

Naja Lund

Asmus Hansen

Mouritz Karlsen

Atassut:

Kim Ezekiassen

Powered by Labrador CMS