Kiisami: Tasiilami meeqqat suleqatigiilluarnikkut ikiorneqarnissaat qulakkeerneqarpoq
Meeqqanut kanngutsaatsuliorfigineqarsimasunut angalaqatigiit Tasiilaq ukiup tullia naallugu tikeraassavaat. Tikeraarneq siulleq ilaatigut pitsaanerusumik suleqatigiittoqarnissaanut atorneqarpoq.
Angalaqatigiit meeqqanik atornerlugaasimasunut ikiuisartut juunimi Tasiilaq siullermeerlutik tikeraarpaat.
Angalaqatigiillu tikilluaqquneqarlutik tigulluarneqarput.
Ingammik sulisorpassuit Tasiilami ulluinnarni meeqqanut attaveqartuusut tikeraarneq nuannaarutigaat.
- Arlaqartut oqarput, ‘kiisami, ikiorneqarnissarput pisariaqartipparput’, Kommuneqarfik Sermersuumi suliaqarfimmi pisortaq, angalaqatigiit angalanerannut siullermut peqataasoq oqarpoq.
Suleqatigiinneq ajortoq
Angalaqatigiit tikeraarneq siulleq misissuinermut aamma meeqqat ikiorneqarnissamik pisariaqartitsisut qanoq pissarsiarisinnaanerlugit paasiniarnerannut atorpaat.
Tamatuma saniatigut ataatsimiittoqarpoq, politiit, atuarfik, paaqqinnittarfiit, inunnik isumaginnittoqarfik, ilaqutariinnut sullissivik aamma atuartut angerlarsimaffiat peqataapput.
Tamatumunnga atatillugu attaveqaqatigiinnik pilersitsisoqarpoq, oqartussaqarfiit assigiinngitsut ilanngunneqartillugit meeqqat annaaneqannginnissaat taakku qulakkiissavaat. Tamatumunngalu atatillugu oqaaseqaatit qulaaniittut oqaatigineqarput.
- Suliassaqarfiit akimorlugit suleqatigiittoqarnissaanik qulakkeerinninnissarput pisariaqartinneqartoq, arlallit oqaatigaat, taamaalilluni maangaannartitsoqannginniassammat, Ellen Magnussen oqarpoq.
- Tamatuma saniatigut ullormit siullermit ilanngunneqarnertik qujamasuutigaat.
Politiit nalunaaruteqartut
Meeqqat inuusuttullu arlallit atornerlugaasimanerannik nalunaaruteqartoqarsimaneranik politiit kommunimut ilisimatitsimmata angalaqatigiit Tasiilamut aallartinneqarput. Attaveqatigiinnikkut suleqatigiinneq ilaqutariinnut sullissivimmi ataatsimoortinneqarpoq, tassani nukissat amerlanerummata.
- Uani suleqatigiinnermi kikkut tamarmik qanoq iliornissamik ilisimaqqissaarnissaannik qulakkeerinissarput pingaaruteqarpoq, Ellen Magnussen nassuiaavoq, taassuma suliniutip najukkameersuunerata pingaassusaa aamma oqaatigaa.
Politiit assersuutigalugu atorluisoqarneranik nalunaarfigineqarunik, taava erngertumik kommunimut nalunaaruteqartoqassaaq. Taamatullu aamma inuit sullissisut Nuummi qitiusumik sullissisarfimmut nalunaaruteqassapput.
Aasianni periuseq atorneqartoq iluatsittoq Tasiilami isumassarsiorfigineqarsinnaasoq, Ellen Magnussen takorluuivoq. Tassani politiinut nalunaaruteqartoqarpat ilaqutariinnut sullissiviup meeraq angajoqqaavilu ingerlaannaq attaveqarfigisarpaat. Tamatuma kingorna meeraq qanimut malinnaaffigineqartarpoq, ingammillu meeraq atornerluineq pillugu oqaluttuarnissamut piareersimanngippat. Meeraq videokkut killisiorneqarluni atornerluineq pillugu oqaluttuarnissaminut piareerpat, ilaqutariinnut sullissivimmi toqqissisimasumik sinaakkuteqarluni tamanna pisarpoq.
Kommuneqarfik Sermersooq apriilimi nalunaaruteqartoqarnerani qisuariartoqarnissaanut qulakkeerinninnissamik alloriarpoq. Nalunaaruteqartunut pigaartoqarfik Nuummi pilersinneqarpoq, tamatumalu nalunaaruteqartoqarneranit akunnerit 24-t iluanni qisuariartoqarnissaanik qulakkiissavaa.
Meeqqap psykoligimik ikiorneqarnissaminut pisariaqartitsinera inerniliunneqarpat, angalaqatigiit ikiuisinnaapput. Taakku psykoterapeutit marluupput, taakku qaammatit tamaasa Tasiilaq sapaatip-akunneranik sivisussusilimmik tikeraartassavaat. Ukioqatigiiaat aamma suiaassutsinut agguataarinnilluni eqimattakkaarluni oqaloqatigiinnernik neqoroornissaq pilersaarutaavoq. Tamatuma saniatigut ammasumik siunnersuisoqassaaq aamma ataasiakkaarluni oqaloqateqarnissamut periarfissaqassalluni.