Kiisami: Inuusuttunut atornerluisunut ukiut pingasut ingerlanerini katsorsaasoqarsinnaalissaaq
Nuna tamakkerlugu meeqqanut inuusuttunullu aanngajaarniutinik pinnguaatinillu ajornartorsiuteqartunut katsorsaanissamut neqerooruteqanngilaq. Maanna periusissatut pilersaarut tusarniaatigineqalerpoq.
Ullumikkut ataqatigiittumik inuusuttunut imigassamik, hashimik pinnguaatinillu atornerluilersimasunut neqerooruteqanngilaq. Tamanna maanna ukiut pingasut ingerlanerini aaqqiivigineqassaaq, nuna tamakkerlugu neqerooruteqalerluni.
Naalakkersuisut periusissatut pilersaarummik tusarniaanermik nassiusseqqammerput, tassanilu neqeroorutigineqartut naammanngitsut oqaatigineqarpoq.
- Kalaallit Nunaanni aanngajaarniutinik aningaasanoornermillu ajornartorsiuteqartunut 18-it inorlugit ukiulinnut nuna tamakkerlugu neqerooruteqanngisaannarsimavoq. Taamaattorli namminersortuni katsorsaanissamut assigiinngitsunik suliniuteqartarpoq, Ilaqutariinnut katsorsaavinni suliniuteqartarluni il.il., neqeroorutilli sukkut tamaana takkuttarsimallutik, periusissatut pilersaarummi tamanna allaqqavoq.
Taamaattumik inuusuttut 18-it inorlugit ukiullit, neqeroorutit inersimasunut tulluarsarneqarsimasut atortassagaat innersuunneqartarsimapput.
Suliniutit arlaannaalluunniit nalilersorneqarsimanngilaq taamaattumilllu sunniutaa ilisimaneqarnani.
Suliniutit inuusuttunut tulluarsarneqarsimasut amerlanngitsut arlaannaalluunniit nalilersorneqarsimanngilaq taamaattumilllu sunniutaa ilisimaneqarnani.
Illoqarfinni annerni tallimani katsorsaaneq
Maannakkut katsorsaanermut neqeroorutinik pilersitsisoqassaaq, taamaalilluni kommunini tallimaasuni illoqarfinni pingaarnerni katsorsaavinnik pilersitsisoqassalluni. Taakku neqeroorutit taamaalilluni inuusuttut 60 procentiisa missaannik sullissisoqarsinnaassaaq. Katsorsaanermi atornerluileriartortut aamma atornerluilereersimasut katsorsarneqarnissamik neqeroorfigalugit sullinneqartassapput.
Katsorsaaviit ukiut pingasut ingerlanerini pilersikkiartorneqassapput, taamaalilluni ukiumi siullermi katsorsaavimmik pilersinneqassalluni, ukiunilu tulliuttuni marlunni ukiumut marlunnik pilersitsisoqassalluni.
Illoqarfinni minnersusuni suliniuteqrneq ilaatigut nittartakkakkut tunngaveqarluni ingerlanneqartassasoq atuarneqarsinnaavoq.
- Katsorsartinnermi pisariaqartitsisoqarnerani katsorsaavinni atorneqartut katsorsaanerit aallaaviatigut atorneqassapput, kisiannili internettikkut taanna piffissami sivikitsumi piffissani sumiiffinni ulluinnarni katsorsaanernik ataqatigiissinneqassallutik, periusissatut pilersaarummi tamanna oqaatigineqarpoq.
Najukkami peqqinnissaqarfimmit aamma kommunimit sullissisumik toqqaasoqassaaq, taakku ilaatigut inuusuttut nittartakkakkut katsorsarneqarnissaminnut aggertarnissaat isumagisassavaat. Pineqartup aamma inuusuttut imigassartorsimanersut imaluunniit hashitorsimanersut misissussallugu suliassaasa ilagissaavaa.
Periusissatut pilersaarummi katsorsaanerup saniatigut pinaveersaartitsinerpassuit allaatigineqarput.