Kiisami: Inuit innarluutillit ineqarfissaat ukiuni 30-ni utaqqineqartoq atoqqaarfissiorneqarpoq
Ineqarfik nutaaq inunnut innarluutilinnut Aasianni kiisami atoqqaarfissiorneqarpoq. Ineqarfik ukiuni 30-ni utaqqineqareerluni.
Suliniut 1993-imi kommunalbestyrelsimi akuerineqarpoq.
Inunnut innarluutilinnut ineqarfittaassaq ukiut 30-t qaangiuppata aatsaat atulerneqassasoq inuttaasut politikkikkullu suliaqartut taamani takorloorsimagunanngilaat.
Sanaartornissamut aningaasartuutissat ukiup tullianut kinguartinneqaqattaartarsimapput. Taamaammat suliniummut pilersaarusiorneq 2018-imi aatsaat aallartinneqarpoq 2020-mi sanaartorneq aatsaat aallartilluni.
Ineqarfik sisamanngornermi maajip sisamaani kiisami atoqqaarfissiorneqarpoq.
Nalinginnaasumik inuuneqarnissaat aqqutissiuunneqartoq
Ane Hansenip, Kommune Qeqertalimmi borgmesterip, ineqarfik kommunalbestyrelsimut qinigaaqqaarnermini siunnersuutigisimallugu.
- Sanartornissamulli aningaasartai tikinneqaraangata aningaasartuutissat allat pillugit kinguartinneqartuartarpoq, ukiuni 30-ni sooq piareerniaaluusarneqarsimanera borgmesterip nassuiarpaa.
Kommunalbestyrelsip ataatsimoorluni pingaartitaraa inuit innarluutillit nalinginnaasumik inuuneqarnissamut aqqutissiuunneqartuarnissaat, Kommune Qeqertalik tusagassiuutinut nalunaarummi allappoq.
Innarluutillit 18-it ineqarfissami inissaqartinneqartut, timigissartarfeqartoq assassortarfeqarluni inimillu aamma ataatsimoorfiusinnaasumik peqarluni.
Nutaaliat qaamasut
Ineqartut tamarmik immikkut ineqassapput, marluk utoqqartaasumut immikkullu pisariaqartitsisunut naatsorsuussaapput. Uffarfiit saniatigut iggaveqarpoq, nillataartitsivik, qerititsivik erruivillu.
- Utaqqisarput. Kiisami ataatsimoorlutik inissaqalerput, ataatsimiititaliami siulittaasoq Niels Kristensen oqarpoq.
- Ineqartussat quttannaqaat, oqarpoq.
Init nutaaliaasut qaamallutik avammullu assut isikkivigittut ilanngullugu eqqaavaa.
