Kiisami utoqqatsertoqarpoq

Meeqqanit 22-nit Danmarkiliartinneqartunit arfinillit kiisami maanna pisortatigoortumik Danmarkimit ministeriunermit Mette Frederiksenimit utoqqatserfigineqarpoq.

Meeqqat inuiaqatigiinnik misiliinermut ilaapput, tassani kalaallisut oqalukkunnaarlutik qallunaatut oqaluttunngorlutik Kalaallit Nunaanni pitsaanerpaanut ilannguttussaatinneqarlutik.

Maanna pisup ingerlanerata tamarmiusup oqaluttuarisaanermut tunngasumik qulaajarneqarnera, juunimili kinguaattooqqareernermi kingorna kiisami saqqummiunneqaqqammerpoq.

- Suliaq ukiorpassuarni malinnaavigisimavara, alianartut inuit nalaassimasaat suli killitsissutigisaqaakka. Meeqqat eqqarsaatigineqarnissaat kingulliunneqarsimavoq. Taamaalillutik ilaquttaminnut, qanigisaminnut attaveqarnertik, Kalaallit Nunaannut nunaqqatiminnullu tunngatillugu inuunermi oqaluttuassartaat annaavaat.

Grønlandsdepartementi kisimi naalagaasoq
Nalunaarusiap inerniliussaa ilaatigut imaappoq:

- Kalaallit meeqqat 22-t misiliutigineqarnerat piffissami oqaluttuarisaanermi piffimmini ilusilersorneqarlunilu ilusinippoq. Sorsunnersuup Aappaata kingorna aqutseriaatsimut allanngornissaannut aamma kalaallit inuiaqatigiit piumasaqaatit annertusipput, 1950-imilu Grønlandskommissionip isumaliutissiissutaa allannguutissanik annertuunik siunnersuuteqarpoq, tassani atuarfeqarneq ilaalluni.

Nunasiaqarnermi sinaakkutini pivoq, tassani Grønlands Styrelse, 1950-imi Grønlandsdepartementi, sulianut kalaallinut tunngasunut apeqqutinullu kisimi annermik naalagaavoq; tassanilu aamma kalaallit meeqqat 22-t uani misissuinermiittut pillugit.

Taamaakkaluartoq aamma Danmark annertuumik sunniuteqarmat, meeqqanut 22-nut taakkununnga qulaajaaneq piareerniariarpat utoqqatsertoqarnissaa ministeriunerup juunimi 2019-imili neriorsuutigaa. Kisianni maanna meeqqanit 22-nit 1951-imi Danmarkiliartinneqartunit arfiniliinnaat inuupput.

- Pereersimasut allanngortissinnaanngilavut. Kisianni paarisussaasimagaluakkatsinnut sumiginnarsimasatsinnullu tunngatillugu akisussaaffimmik tigusisinnaavugut utoqqatserfigalugillu. Maannakkut inuusut arfinillit inuttaat allaffigisimavakka, tassani Danmarki sinnerlugu taakkununnga – ilaannullu – utoqqatserlunga, Mette Frederiksen oqarpoq.

Kielsen assut killitsittoq
Danmarkip Kalaallit Nunaatalu attaveqarnerat ullumikkut allaanerulluni naligiinnerusoq, nunat marluk ataatsimoorlutik oqaluttuarisaanertik kingumut qiviarlugu taamanikkut politikikkut aalajangiinerit kinguneri ataatsimoorluta takusinnaagigut, Naalakkersuisut siulittaasuata Kim Kielsenip oqaatigaa.

- Meeqqat 22-t nalaassimasaat pillugit saqqummiussaq killitsinnareqaara. Immikkut ittumik alliartornerat ilaqutaannut, inuiaqatigiinnut minnerunngitsumillu kalaaliussusaannut atatillugu kingunerluuteqangaatsiarpoq, Kim Kielsen oqarpoq.

Qulaajaaneq tamakkiisoq UANI atuaruk