Kiisami akuerineqartoq: Imaani ikuallattumik qamitsinermik ilinniagaq nutaaq
Imarsiornermik Aqutsisoqarfiup Nuummi STCW-mik ilinniarneq akueraa. Tamanna arlalinnik iluaquteqassaaq, upalungaarsimanermut pisortaq aamma Danke Rederier taama oqarput.
Kommuneqarfik Sermersuumi upalungaarsimasut Danmarkimi Imarsiornermik Aqutsisoqarfimmit akuerineqarput, Imarsiornermik Ilinniarfiup neqeroorutigisartagaanik STCW-mik ilinniarnerup ingerlanneqartarnissaanut.
Ilinniagaq imarsiornermi isumannaallisaanermi pingaaruteqarpoq, imarsiortunut saaffiginnittuuvoq, umiarsuarni ingerlatsinermik suliassanik isumaginnittuusunut, kommunip nittartagaani tamanna atuarneqarsinnaavoq. Pingaartumik aalisarnermik inuussutissarsiuteqartut ilinniakkamik nutaamik iluaquserneqassasut naatsorsuutigineqarpoq.
Ilinniakkap akuerineqarniarneranik suliaq ukiuni marlunni ingerlavoq, kisianni utaqqineq akilerpoq, upalungaarsimanermut pisortaq Jes Damgaard Andersen nassuiaavoq.
Iluaqutissaat annertuut
Ilinniakkamut atatillugu aningaasartuutaasartut siunissami annikinnerungaalerumaartut taassuma naatsorsuutigaa, nunaqavissut ilinniakkamik naammassinninniarlutik Danmarkimut angalaqqaartarsimanerat pissutigalugu, ilinniakkallu nutaap imarsiornermik suliaqartut nunatsinni iluaqusissagai.
Umiarsuaateqarfiit (Danske Rederier), nalagaaffeqatigiinnermi umiuarsuaateqarfiit kattuffiattut sulisitsisutullu atuuppoq, STCW-mik Nuummi ilinniakkamut periarfissat nutaat pitsaasumik qisuariarfigaat.
STCW-mik ilinniarfissanik neqerooruteqarneq pitsaasuuvoq, ilinniartoqarnissaanik tunngavissaqartillugu, tassami ataatsimut isigalugu umiarsuaateqarfiit umiartortunik assut pissarserusuttarmata. Imarsiornermik ilinniarfiit ileqqutoqaqarput imarsiornermik inuussutissarsiuteqarnermi pitsaasunik ilinniagaqartitsisarnermik, Danske Rederier taama oqariartuuteqarput. Taakkulu tulluusimaarput massakkut tamanna Nuummi periarfissaalermat.