Urani

Kiinamiut ingerlatsiteqatigiffiat Uranisiorfissaq tigusinnaanngikkaat

Kinamiut ingerlatsiteqatigiiffia Shenghe, GME-p 60 procentia tigunissaanut isumaqatigiissuteqarsimanngilaq. Inatsisitigut nalilersuisoqareernerata kingorna Naalakkersuisoqarfik taama naqissusiivoq.

Kinamiut ingerlatsitseqatigiiffiat Shenge Kuannersuarni pilersaarummut isumaqatigiissutaasimasumut aalajangiisinnaassuseqartumik sunniuteqanngillat.

Greenland Minerals & Energyp (GME) Shenghellu isumaqatigiissutaat Naalakkersuisoqarfiup taama nalilerpaa.

Shenghe Kinami niuffaffiit saqqummersittagaani GME-mut 60 procentiinik piginnittuullutik nalunaaruteqarlutik allasserinnissimangaluarput. Taamaaliornikkut ingerlatsitsiviup uranimik aatsitassanillu qaqugutigoortunik piianissamut pilersaarummut tigusiniaraluarlutik.

Niueqatigiittarfinnut eqqumiitsumik nalunaaruteqarneq

Ukiarmanna Shenghep GME-p aktiaatai 12,5 procentit pisiarivaat. Tassunga tunngatillugu Shenghe Kinamiut niueqatigiittarfiinut nalunaaruteqarpoq tassani aktiat amerlanersaat pisiarisinnaanerat periarfissinneqarsimalluni.

- Kuannersuarni pilersaarut piaasoqarnissaanut akuersissuteqartoqarsimavoq teknikkikulli nalimmassaasoqarsimalluni, taamaasilluni Shenghe Ressources taakku piginneqatigiit sinnerlugit pilersaarummi 60 procentit sinnernangit piginneqataassanerlutik isumaqatiginninniatussanngorlutik, nalunaarummi allassimasoqarpoq.

Nalunaarut qanoq atuarneqassanersoq aallaqqaammulli ersarissimanngilaq. GME-llu australiamiut niueqatigiittarfiinut nalunaarummini periarfissiisimaneq eqqaanngimmassuk ersarlunnerulersitsiinnarsimavoq.

Tigusinissaq GME-p eqqunnginneraraa

Ingerlatsitseqatigiiffiulli pisortaanerata John Mairip taama periarfissiisoqarsimanngitsoq aamma eqqortuunnginnerarpaa.

- Shenghep sivisuumik suleqataanissani soqutigisaraa, pilersaarummulli aningaasaleeqqissimalluni, taamaattoq suleqataassangunik angusat suliniutillu aallaavigineqassasut, taanna oktobarip qaammataani Sermitsiaq.AG-mut oqarpoq.

Isumaqatigiissutit tunniunneqarnissaa saqitsaassutaasoq

Taamatulli oqaaseqarneq maannakkut Aatsitassanut Naalakkersuisoqarfimmit eqqortuunerarneqarpoq.

Naalakkersuisoqarfiup GME attaveqarfigisimavaa, taakku siullermik pisisimanermut isumaqatigiissut tunniukkusussimanngikkaluarpaat. Naalakkersuisoqarfiulli erseqqissarsimavaa isumaqatigiissut utertinneqanngiinnarpat akuersissutaajarneqarnermik kinguneqarsinnaasoq.

Inatsisitigut misissuineq

Tamatuma kingorna Naalakkersuisoqarfik misissueqqissaarpoq. Naalakkersuisoqarfik inatsisilerituunik avataaneersunik suliffeqarfilerinermik immikkut ilisimasalinnik isumaqatigiissutip misissortikkumasimavaat.

- Nalilersuineq manna naammassivoq, inatsisillu naapertorlugit naliliineq ersarilluinnarpoq. Isumaqatigiissummi Leshan Shenghe GME-p piginnittuanut suliffeqarfimmut aalajangiisinnaassusilimmik tigusinissamut pisinnaatinneqanngilaq, Naalakkersuisoqarfiup pisortaa Jørgen T. Hammeken-Holm tusagassiuutinut nalunaarummi allappoq.

- Isumaqatigiissummi Leshan Shenghe taamaallaat GME-p 12,5 %-ianik pisinissamik pisinnaatinneqarpoq. GME-p Kalaallit Nunaanni suliffeqarfiani aalajangiisinnaassusilimmik sunniuteqarneq suli suliffeqarfiup piginnittuani Greenland Minerals and Energy Ltd-miippoq.

Tunniussineq akuersissutigineqaqqaartussaq

Tamanna pingaaruteqarpoq, Shenghe-mi Kuannersuarni piiaanermi tigusissappat tamanna Naalakkersuisunit akuerineqaqqaartariaqassaaq.

- Aatsitassanut inatsimmi ersarilluinnartumik akuersissutit Kuannersuarni pilersaarutitut ittut Naalakkersuisut akuersitinnagit allanut tunniunneqarsinnaannginnerat allassimavoq. Tamanna aamma atuuppoq toqqaannaanngitsumik tunniussisoqarsimangaluarpat, akuersissulli tingerlatsitseqatigiiffimmiinginnaraluarpat, ingerlatsitseqatigiiffimmilu aalajangiissuseqartumik sunniuteqartoq allannguingaluarpat, Jørgen T. Holm-Hammeken allappoq.

Shenghe suliffeqarfissuuvoq nuimanersat ilaat, aatsitassat qaqutigoortut ilaatigut oqarasuaatini angallattakkani innaallagissiuutinilu anorisaatini atorneqartarlutik.

Powered by Labrador CMS