Kiinamiut GME-mik tigusinissaat akuersissummik pisariaqartitsivoq

Aatsitassanut Naalakkersuisoqarfimmi sulisut ilaannut sapaatip akunnerata naanera ulapiffiuvoq.

Kiinamiut ingerlatseqatigiiffiata Shenghe Ressourcesip Kuannersuarni piiaasoqalissappat GME-mi piginneqataassutsit 60 procentii pisiarinissaannut periarfissaralugu nalunaarummi oqaluttuarisimagaa, aviisip Politikenip tallimanngornermi unnukkut allaaserinninnera tamatumunnga pissutaavoq.

Nalunaarutit akerleriit
GME nammineerluni Sydneymi børsimut nalunaarummik nassiussimmat, tassani 60 procentimut pisinissamik periarfissat taaneqanngimmat, nalornineq annertusineqarpoq.

Maanna Aatsitassanut Naalakkersuisoqarfik børsimut nalunaarummik, Shenghe Ressourcesimit Shanghaimi børsimut nassiunneqarsimasumik nutsikkamik pisimalerpoq.

Maanna aningaasaleeqataassutaannaat
Kuannersuarni piiaaffiup 60 procentiinik pisinissamut periarfissaq tassani taaneqarpoq, piumasaqaatit assigiinngitsut naammassineqarsinnaappata. Oqaasertaliinerilli ersernerlupput, Shenghep GME-mi piginneqataassutsit 12,5 procentit pisiarai.

- Maannakkkorpiaq aningaasanik nuussineq kisimi pineqarpoq, tassani Shenghe aningaasaleeqataassutinik akiliivoq, taamaalilluni GME-p piiaaffik ineriartortissinnaassammagu, Aatsitassanut Naalakkersuisoqarfimmi pisortaq Jørgen T. Hammeken-Holm taama naliliivoq.

Piginneqataassutit 12,5 procentiinik pisineq akuersissummik pisariaqartitsinngitsoq taassuma naqissuserpaa, Shenge aalajangiisumik GME-mut sunniuteqannginnera tassani pineqarmat.

Naalakkersuisut akuersisssapput
Naalakkersuisoqarfiulli suliaq misissorluarniarpaa, tassani suut piumasaqaatit piginneqataassutit 60 procentiisa ataaniittut tiguniarneraat erseqqissumik allaqqanngimmat.

- Piumasaqaatinik arlalinnik imaqarput, maannalu piumasaqaatit taakku qanoq isumaqarnersut misissorniarparput, Jørgen T. Hammeken-Holm nassuiaavoq.

Kiinamiut ingerlatseqatigiiffiata imaaliallaannarluni GME-mi aalajangiisutut piginneqataassutit tigusinnaanngikkai, taassuma aamma naqissuserpaa.

- Piginneqataassutsit annerpaartaat pisiarissagunikkit Naalakkersuisut akuerseqqaartariaqarput, naalakkersuisoqarfimmi pisortaq oqarpoq.

Aatsitassat qaqutigoortunut, assersuutigalugu mobilinut aamma anorisaatinut innaallagissiuutinut atorneqartartunut tunngatillugu, Shenghe suliffeqarfiit siuttut ilagaat.

Kuannersuarni suliniut aatsitassanut qaqutigoortunut aamma uranimut tunngasunik suliaqarfiuvoq.