Kiinamikkut kiitissimasut: Piniartut pingasut nannumit saassunneqartut

Piniartut marluk Uummannap avaannaani nannumit kiinamikkut kiitissimapput. Piniartut pingajuata nanoq qimaatillugu aallaammik aallaasimavaa.

Nanoq, Isbjørn, sommeren 2014, Aappilattoq

Uummannap avannaani piniartut angutit marluk sapaatip akunnerata siuliani sisamanngornermi ajoqusingaatsiarsinnaagaluarput, qujanartumilli ajornerusumik pisoqanngilaq.

Piniartut taakku angut alla pingajoralugu umimmanniarlutik piniariarsimapput, umimmassimallutillu nannumik kaattumik tassanngaannartumik saassunneqarput, KNR allappoq.

Kalaallit Nunaanni politiit pigaartuisa pisortaat, Julie Senderovitz-Bendtsen oqarpoq.

- Piniartut pingasut umimmammik aattuleruttorlutik nannumik pakasartipput. Nannup angut ataaseq siutaatigut talerperlikkut kiivaa piniartullu aappaat kiinaatigut talerperlikkut aamma kiillugu, tassanilu piniartut pingajuata ungasinnerulaartumiittup qoorortuuni tigupallariarlugu nanoq aallaavaa, nanorlu qimaatillugu, Julie Senderovitz-Bendtsen oqarpoq.

Piniartut marluk kiitittut annerusumik ajoqusinngillat – nunaqarfimminnullu aqaguani unnukkut tikikkamik pisoq aatsaat nalunaarutigalugu. Piniartut Ikerasanneersuupput, nunaqarfik Uummannamit 45 kilometerit missaannik ungasitsigisumiippoq.

- Piniartut ikerminnik napparsimavimmut takutitsiartoqquvagut. Tassami nannumit kiitinnikkut arlaanik tunillaasoqarsinnaanera eqqarsaatigigatsigu. Tamatuma kingorna oqaloqatigeqqinngilagut, sianeramilli ajunngillat, pigaartut pisortaat oqarpoq.

Piffissaq maannakkut aavariarnerup naleraa, Uummannallu avannaani nanoq inunnut qanillattortoq kisimiinngilaq.

Aasiaat qanittuani sapaatip akunnerani matumani nannuttoqarpoq, nanorlu alla aamma Ilulissat eqqaani takuneqarluni.

- Piniariat pisaqarsimasut nannunut kaattunut, pisat tipaannik naamalluartartunut immikkut ittumik mianersornissaannik kaammattuuteqarfigaagut, Julie Senderovitz-Bendtsen oqarpoq.

Nanoq susimanersoq oqaatigineqanngilaq. Nanoq aallaaneqarami qimaavoq – pisumilu suna tamarmi sukkangaarmat nanoq eqqorneqarnersoq paasineqanngilaq.

Powered by Labrador CMS