Kigutit narlorsarneqartarneri pillugit Wangenheim akissutiserusuppoq

Demokraatiniit Anna Wangenheimip Peqqissutsimut Naalakkersuisoq Kirsten Fencker, Naleraq, meeqqat kigutaasa narlorsarneqartarnerinut suliamut tunngatillugu arlalinnik apeqquteqarfigaa.

Anna Wangenheimip paaserusuppaa meeqqat kigutiminnik narlorsarneqarnissamik innersuunneqarsinnaalerneranni piumasaqaatit suunersut.

Ilanngullugu paaserusuppaa meeqqat qassit neqeroorfigineqarsimanersut.

- Taamaattumik tusarusuppara, pilersaarutinik tigussaasunik aallartitsisoqarsimanersoq kigutinut narlorsaatinut tunngatillugu kingullermik isummersornerma kingorna. Suliniut ilaqutariinnit meerartalinnit soqutigineqarsimaqaaq, taamaattumillu pissusissamisoorpoq, uannut saaffiginnittarnerat, tassa ilaqutariit meerartallit arlallit oqaluttuarmata meeqqaminnut taamatut ittumik suliamik aallartitseqqinnerma kingorna, neqeroorutinik amigaateqarlutik. Tamannami neriorsuutaasimasup akerlerluinnaraa, Anna Wangenheim allappoq.

Pisortani kigutinik narlorsaasarnermut neqeroorut 2019-imi unitsinneqarpoq, Nuummili 2021-p aallartinnerani atuutsileqqinneqarluni.

Sooq aningaasat atorneqanngillat

Demokraatit Inatsisartunut ilaasortaatitaata ilanngullugu paaserusuppaa aningaasanut inatsimmi 2020-mi kigutinik narlorsaasarnermut aningaasaliissutit tamakkerlugit sooq atorneqarsimannginnersut:

- Kigutit alleqqullu narlorsarnerinut tunngasumik Aningaasanut inatsimmi atuisimanermut Naalakkersuisut nassuiaateqarsinnaappat?

Apeqqutinilu nassuiaaserlugu:

- Siorna karsip misissorneqarnerani ersarissivoq, Aningaasanut Inatsimmi konto Kigutit alleqqullu narlorsarnerinut atugassani aningaasanik atorneqanngittoqartoq.

- Tamanna assut paasiuminaatsissimavarput, tassa siusinnerusukkut nalunaarutigineqarsimammat, meeqqanut tamanut kigutinik nallorsaanissamik neqerooruteqarnissamut akissaqartoqanngitsoq, Peqqissutsimulli qullersat aappaatigut oqaaseqaateqarlutik, 20 millioner koruuninik pisariaqartitsisoqassassoq kigutinut nallorsaatinik neqerooruteqartoqassappat, allappoq.