Kigutit equngasut aaqqinneqartarnissaat aningaasanut inatsisissatut siunnersuutimiissanersut oqaloqatigiissutigineqassaaq
Innuttaasut meeqqamik kigutaasa bøjleqarnissaat namminneerlutik akilertassavaat? Apeqqut taanna aningaasanut inatsisissamut isumaqatiginninniarnermut ilanngunneqarpoq.
Naalakkersuisut ataatsimiinnerminni septemberip 23-ani ullulerneqarsimasumi aalajangerput meeqqat kigutaasa bøjlelertinneqarnissaannut neqeroorut 2020-mut aningaasanut inatsisissatut siunnersuummut isumaqatiginninniarnermut ilanngutissallugu.
Sermitsiaq.ag-p juulip aqqarnani allaaseraa Peqqinnissaqarfimmi aalajangerneqarsimasoq kommunit kigutileriffiini meeqqat bøjlelertinneqartarnerat unitsinneqartoq. Tamanna arlalinnit isornartorsiorneqarpoq. Inatsisartuni peqqissutsimut ataatsimiititaliamit naalakkersuisoqatigiillu tapersersuisuinit demokraatinit aalajangerneq isornartorsiorneqarpoq.
Peqqinnissaqarfiup aalajangernerata kingunerissavaa meeqqat kigutaat bøjlelerneqartariaqarpata, tamanna angajoqqaat akilissagaat. Ilaqutariinnut aningaasartuut meeqqamut ataatsimut 20.000-it 30.000-illu akornaneeratarsinnaavoq.
Nalunaarummik malinninngitsoq
Aalajangernerli namminersornerullutik oqartussat nalunaarutaannut nr. 15-imut, septemberip 13-ani 2006-imeersumut naapertuutinngilat. Nalunaarummi allassimavoq kigutigissaanermik neqerooruteqarfigineqarnissaannut naammattunik sulisussaqanngippat aningaasassaqartitsisoqaraniluunniit, meeqqanut inuusuttunullu aaqqissuussaasumik kigutigissaasarnissamik neqerooruteqarnissaq pingaartinneqassasoq.
Peqqissutsimut naalakkersuisoq Martha Abelsen (S) kingusinnerusukkut ilisimatitsivoq suliaq politikkikkut aalajangiiffigineqaqqaassasoq. Politikkikkut aalajangernissaq augustip naanerani pissaaq. Piffissaliussarli qaangereerlugu aatsaat aalajangertoqarpoq.
Suliap aningaasanut inatsisissatut siunnersuummut isumaqatiginninniarnernut ilaatinneqassasoq, Naalakkersuisut maanna aalajangerput.
Isumaqatiginninniarnerni ilaassaaq
Peqqissutsimut naalakkersuisoqarfimmi pisortaq Tine Pars Sermitsiaq.AG-mut ilisimatitsivoq meeqqat kigutaasa bøjlelertinneqartarnissaannut aaqqiissutissatut siunnersuutigineqartup aappaa annertunerusumik aningaasartuuteqarfiussammat isumaqatiginninniutaasussanngortoq.
- Nuna tamakkerlugu meeqqat bøjleqartalersinnaanerannut siunissami neqerooruteqarsinnaanermut tunngatillugu peqqinnissaqarfimmi qullersat marlunnik siunnersuuteqarput. Siunnersuut ataaseq annertunerusumik aningaasartuuteqarfiussammat Naalakkersuisut aalajangerput suliaq aningaasanut inatsisissatut siunnersuummut isumaqatiginninniarnerni ingerlateqqinneqassasoq, naalakkersuisoqarfimmi pisortaq Tine Pars Sermitsiaq.AG-mut mailikkut akissuteqarluni ilisimatitsivoq.
Naalakkersuisoqarfiup ilisimatitsissutigaa aningaasartuuteqarnerunissaq 15-it 20-t milliuunit koruunillu akornanni ukiumut akeqassasoq, tassa kigutilerisut immikkut suliaqarsinnaasut sulisorineqalersinnaappata.
Meeqqat kigutaasa bøjlelertinnissaannut neqeroorut peqqinnissaqarfiup tigummereeraluaraa, taamaattoq suliaq sooq aningaasartuuteqarnerulerfiussanersoq pillugu, naalakkersuisoqarfimmi pisortap ilisimatitsissutiginngilaa.
Læs hele sagen:
-
Den offentlige tandpleje dropper bøjler
-
Pisortat kigutileriffiini bøjlelersuiunnaarput
-
Ændring i tandplejen er i strid med bekendtgørelse
-
Kigutigissaanermi allannguisoqarnera nalunaarummik malinninngilaq
-
Spar ikke på tandsundheden
-
Meeqqat kigutaasa peqqissusaannut tunngatillugu sipaarasi
-
Tandbøjle-sag er under al kritik
-
Bøjlet pillugit suliaq isornarluinnarpoq
-
Nedskæringer er ikke godkendt
-
Chokregning på 40.000 kr.