Kigutinik narlorsaanermi suliaq: Suna upperissavarput?

Kigutinik narlorsaanissamut neqerooruteqartoqarpa, imaluunniit naamik? Peqqissutsimut Naalakkersuisup, Anna Wangenheimip akissutai imminnut assortuuttut aallaavigissagaanni, apeqqutip taassuma akissutaa suli ilisimaneqanngilaq.

Kigutinik narlorsaasarneq pillugu suliaq paatsiveerunnarluinnarpoq.

Peqqissutsimut naalakkersuisoq, Anna Wangenheim meeqqat Nuummiittut kigutaasa narlorsartarnissaannut neqerooruteqarneq atulerseqqinneqassasoq, sapaatit akunneri pingasut qaangiummata nalunaaruteqarpoq.

Naalakkersuisorli taannarpiaq illuatungerluinnaanik maanna oqariartuuteqarpoq, ilisimatitsigami Kalaallit Nunaanni sumiluunniit kigutinik narlorsaanissamut neqerooruteqartoqanngitsoq:

- Maannakkut kigutinik narlorsaaneq Kigutileriveqarfimmit neqeroorutaanngilaq, taamaattumik sumiikkaluaraanniluunniit kigutit narlorsartinnissaanut neqeroorfigitittoqarsinnaanngilaq, Inatsisartunut ilaasortamut Aqqalu Jerimiassenimut akissuteqarluni allappoq.

Imminnut assortuuttut

Inatsisartunut ilaasortamut akissutit tunniunneqaqqammersut, qaammammi matumani tusagassiorfinnut nalunaarummit allaanerulluinnarput.

Nalunaarumminimi allappoq kigutinik narlorsaanissamut neqeroorutip unitsinneqarsimaneranut akerliujuarsimalluni:

- Nuna tamakkerlugu maanna neqerooruteqarsinnaannginnerput tunngavigalugu, Nuummi neqerooruteqarsinnaaleqqinnitsinnut aporfigissanngilarput.

Nunatsinni, minnerpaamilluunniit Nuummi, kigutinik ilumut narlorsaasoqartarnersoq, ilisimaneqanngikkallarpoq – suli.

Immikkut ilisimasallit amigaataapput

Kigutinik narlorsaasarneq pillugu suliaq innuttaasunit politikeriniillu arlalinnit qaammatini kingullerni arlalinni isorineqangaatsiartareerpoq. Peqqissutsimut maanna naalakkersuisuusoq, Anna Wangenheim, neqerooruteqarnerup unitsinneqarnera pillugu siornatigut isorinnittumik appiussisimavoq, tamannalu isertuunnagu.

Nuummili kigutinik narlorsaasarnerup neqeroorutaaqqilersimaneranik taasaqanngilaq. Aqqalu Jerimiassenimut akissuteqarnermini nassuiaavoq kigutit nakorsaat kigutinik narlorsaasinnaanermut immikkut ilisimasallit Danmarkimi amigaataasut, taamaammallu nunatsinni atorfinitsinniarneri ajornakusoorsinnaalluni.

Nuummili sinerissamiluunniit ataavartumik atorfinitsitsinissamut suliniuteqartoqarsimaneranik takussutissaqarpasinngilaq.

Sofia Geislerip paragraf 37 atorlugu apeqquteqaataanut akissummini, Anna Wangenheim allappoq, kigutit nakorsaannik immikkut ilisimasalimmik atorfinitsitsiniarluni 2017-imili allagarsiisoqarsimanngitsoq:

- Aap, eqqorpoq kigutit nakorsaannik kigutinik narlorsaasinnaanermik immikkut ilinniarsimasumik ortodontimik aalajangersimasumik atorfinitsitsinissamut inuttassarsiuussisoqarsimanngitsoq. 2016-imi kigutit nakorsaannik immikkut ilisimasalinnut siunnersuisunut isumaqatigiissuteqartoqarpoq, ukiumut 5-6-eriarlutik Nuummukartartunik, taakku pisariaqartitsineq matussuseqqasimavaat, isumaqatigiissullu ulloq manna tikillugu ingerlatiinnarneqarsimalluni, allappoq.

Powered by Labrador CMS