Kigutinik narlorissaanissamik neqeroorutip annertusineqarnissaa ilisimasallit misissussavaat
Nuup avataani meeqqat kigutaannik narlorissaasarnissamut qulakkeerinninnissamut aningaasassaqartoqanngilaq imaluunniit sulisut naammanngillat, Mimi Karlsen ilisimatitsivoq, taamaakkaluartoq neqeroorutip annertusineqarnissaanut periarfissat misissussagaat qinnuiginnippoq.
Mimi Karlsenip kingutinik narlorissaanissamut neqeroorutip maannakkut atuuttup annerusineqarnissaanut atorfilittat misissueqquai. Sulinermi matumani immikkut ilisimasallit avataaneersut peqataatinneqassapput, marsimi periarfissat allakkatigut saqqummiunneqarnissaat naatsorsuutigineqarpoq, meeqqanut, inuusuttunut, ilaqutariinnut peqqissutsimullu naalakkersuisoq paragraf 37 naapertorlugu akissuteqaammi allappoq.
- Peqqinnissaqarfik piffissami matumani nuna tamakkerlugu neqerooruteqarnissamut aningaasaliissuteqarnikuunngilaq.
Mimi Karlsen taama oqarpoq, neqeroorutip annertusineqarnissaanut aningaasaleeqqinnissamik pisariaqartitsissasoq nangilluni oqaatigaa, tamannalu politikkikkut aningaasanut inatsisissamik isumaqatiginninniarnikkut ingerlanneqassasoq.
Aningaasaliinerilli kisimik naammannavianngitsut naalakkersuisup oqaatigaa. Tassami najukkami kigutilerinissamut pisariaqartinneqartumik malitseqartitsinissamut kigutinik narlorissaanermi suliarinnissinnaasunik suliatigut piginnaanilinnik atorfinitsitsisoqarnissaa aamma pingaaruteqarluinnarpoq.
Nuummi kigutileriffik
Tassa ajornartorsiut taanna meeqqat 18-it inorlugit ukiulinnut kigutinik narlorisaasarnissamut juulimi 2019-imi atorunnaarsitsinermut pissutaavoq, aningaasat amigaatigineqarmata aamma kigutit nakorsaannik immikkut ilisimasalinnik atorfinitsitsiniarnermi unammilligassaqartoqarmat.
Innersuussisarnermut piumasaqaatit pisortatigoortut aallaavigalugit 2020-mi kigutinik narlorissaasarneq akuersissutiginiarlugu Naalakkersuisut aalajangerput. Kigutinut narlorsaatit atorlugit katsorsartinnissamut innersuussisarnermut piumasaqaatit erseqqissut pilersinneqarnissaannut siunertaasoq tassaavoq, meeqqat peqqinnissaq pillugu katsorsarneqarnissamut pissutissaqarsorineqartut aammalu eqqortumik katsorsarneqannginnermikkut kigutikkut alleqqukkullu innarlertussata assigiimmik aamma piffissaagallartillugu toqqarneqartarnissaasa qulakkeerneqarnissaat.
Eqqunngitsumik suliarinnittoqarnissaa annikinnerpaaffianiitsinniarlugu sumiiffinni kigutilerinissamut pisariaqartinneqartumik malitseqartitsinissamut sulisussarnissaa kingutinik narlorissaanissamut piumasaqaataavoq. Massakkut Nuummi taamaallaat qitiusumik kigutileriffimmi taamatut suliaqartoqarsinnaanera ajornartorsiutaavoq.
Nuna tamakkerlugu neqeroorutaanngitsoq
Meeqqanut 18-it inorlugit ukiulinnut kigutinik narlorsaalluni katsorsaanerit Nuummi innuttaasunut taamaallaat neqeroorutigineqartarnissaannik Naalakkersuisut sooq attassinersut, Doris J. Jensenip Siumumeersup paaserusuppaa.
Kigutiik narlorissaanermik aallartitseqqinnermi, sumiiffinni sulinermut sulisussaqarnermullu tunngatillugu neqeroorummik attassinissamut ajornartitsiffiunngitsunut, Aningaasanut Inatsimmi aningaasaliissutigineqarsimasunik aningaasalerneqarpoq.
Tassunga 2,3 millionit koruuninik immikkoortitsisoqarsimavoq, tamannalu nuna tamakkerlugu pisariaqartitsinermut naammanngilaq, Mimi Karlsen ilisimatitsivoq. 2019-imi missingersuisoqarneranit erserpoq nuna tamakkerlugu neqerooruteqarneq ukiumut 20 millionit koruunit missaannik akeqassaaq.
Mimi Karlsenip oqarnera naapertorlugu, nunatsinni innuttaasut tamarmik sapinngisamik assigiimmik kigutileritinnissaannut atatillugu neqeroorfiginissaannut eqqarsaatigineqartumut Naalakkersuisut isumaqataapput, maannalu piviusorsiortuunngitsoq nassuerutigaa.