Kiffartuussut nutaaq: Neqeroorutitut aviisit Sermitsiaq.AG-mi atuartakkit
Brugsenip sapaatip akunneranut neqeroorutai, siunissami toorsilaaginnarlutit takusinnaanngussavatit. Taakkumi Sermitsiaq.AG-kkut atuarneqarsinnaanngussapput.
Piffissami inuuvugut, atuisut amerliartuinnartut minguinnerusumik avatangiiseqarnissatsinnik piumasaqarfianni. Tamanna arlalitsigut oqaatigineqartarpoq, aamma minguinnerusunik nukissiuuteqartoqarnissaa, plastikkinik atuinikinnerusoqarnissaa, nerisassat akuutissaqanngitsut il. il. piumaneqarnerulernikuupput.
Digitalinngorsaanermilu tamanna aamma atuuppoq. Pappialanik atuinikinnerusoqassaaq. Minnerunngitsumik qalipaatigissaartunik avatangiisinut ajoqusiisartunik saqqummiussisoqannginnerusassalluni.
- Suliffeqarfippassuuvugut printerisarnermiit digitalimut ikaarsaarniartut, tusagassiorfimmi Sermitsiaq.AG-mi pisortaaneq Christian Schlutz-Lorentzen oqarpoq, nangillunilu:
- Taamaammat Brugeni peqatigalugu misiligummik suliniummik aallartitsisinnaanerput nuannaarutigaara, tassa pisiniarfiup neqeroorutitut aviisiliarisartagaasa nittartakkatsigut Sermitsia.AG-kkut misiligutaasumik saqqummiunneqartarnissaat isumaqatigiissutigisimavarput. Soorunami suliniutigisatta ajunngitsumik ingerlanissaa anguniassavarput. Tassa atuisut periarfissamik tigusilluarlutik digitalikkut neqeroorutinik misissuisarpata tamanna ingerlatiinnassavarput. Tamanna tamanut iluaqutaassasoq, Christian Schultz-Lorentzen tugassiorfimmi nammineq printerlugit aniatittakkat digitalikkut isumagineqartalernissaanik sulissuteqartoqarneranik ilisimatitsissuteqartoq oqarpoq.
- Nuna tamakkerlugu aviisinik AG-mik Sermitsiamillu atuartartut amerliartuinnartut digitalikkut aviisimik ukiuni kingullerni pisartagaqalersinniarneqarnerat iluatsissimavarput. Ineriartorneq suli sukkanerusumik ingerlatissavarput, Christian Schultz-Lorentzen oqarpoq.
Brugsenimi ukiut arlallit ingerlaneranni suliffeqarfiup nittartagaa annertusarneqarsimavoq, ilaatigut neqeroorutit digitalikkut saqqummiunneqartalersimallutik. Aamma kingullertigut app atorneqalersimavoq.
- Brugsenmi digitaliseeriineq pingaartinneqarsimavoq, tamannami sullitatsinnut anngunnissamut nutaamik periarfissiimmat, peqatigitillugulu nittarsaassisarnitsinni piujuartitsinerusumik ingerlatsisalissaagut, Brugsenimi Sulisoqarnermut, Attaveqartarnermut Nittarsaassisarnermullu pisortaq Benny Reffeldt oqarpoq, nangillunilu:
- Sermitsiaq.AG-mit suleqateqalernitsigut, digitalikkut aviisit inunnut suli amerlanerusunut saqqummiunneqartalissapput, Kalaallimmi Nunaanni nutaarsiassaqartitsivimmi alakkarneqarnerpaasartumi aalajangersimasumik inissaqartinneqaleratta.
Brugsenip neqeroorutai quppernerup ataata tungaaniittut takukkit.