Kiffartuussinissamut isumaqatigiissutissat akuersissutigineqartut

Naalakkersuisut Kalaallit Nunaanni ilaasunik angallassinermi kiffartuussinissamut isumaqatigiissutit akueraat. Tamamma pivoq Inatsisartut Aningaasaqarnermut Akileraartarnermullu Ataatsimiititaliaat siumoortumik akuersiteqqaarlugit.

Kiffartuussinissamut isumaqatigiissutit ukiuni qulini tulliuttuni atuutissapput.

Isumaqatigiissuteqarfigineqarput Air Greenland, Disko Line, Norlandair aamma Arctic Umiaq Line. Ingerlatseqatigiiffiit taakku ukiuni qulini tulliuttuni Kalaallit Nunaanni ilaasunik, allakkanik nassatanillu assartuisartuussapput.

Tamanna attaveqaatinu Naalakkersuisup tallimanngornermi ualikkut tusagassiortunik katersortitsinermi ilisimatitsissutigaa.

- Anguniagaq aallaqqaammulli ersarippoq – innuttaasunut angallanneq pitsaanerusoq, Karl Frederik Danielsen tusagassiorfinnut nalunaaruteqarnermi, attaveqaatinut naalakkersuisoqarfimmit nassiunneqartumi oqarpoq.

- Suliaq sivisusimavoq, aammalu siunissamut ungasissumut angallannermut politikkikkut siunnerfeqartumik kusanartumik angusaqarnissaq iluatsikkatsigu tulluusimaarpunga. Ullumikkut atorsinnaasut ingerlateqqissavagut, aammalu aaqqissuussaaneq pitsaanerusoq, atortut nutaat nutaliaasullu, kiisalu iluarsiissutit arlalippassuit, naggataagut angalasunut tamanut pitsannguinernik ersarissunik misigisaqarfiusussat ilassutigissavagut, attaveqaatinut Naalakkersuisoq Karl Frederik Danielsen oqarpoq.

Ukiuni qulini pitsaassuseq anguneqassasoq

Ukiuni qulini atuuttussamik isumaqatigiissuteqarnermut tunngaviuvoq, Naalakkersuisunit akit pitsaassuserlu eqqarsaatigalugit piffissamut sivisunerusumut kiffartuussinermut isumaqatigiissuteqarnikkut isumaqatiginninniarnerni pitsaanerpaanik angusaqarsinnaaneq kissaatigineqarnera. Aamma tamanna peqqutigalugu angallasseriaatsimi, ukiuni kingullerni tamat akornanni aamma politikkikkut oqallinnerni oqaluuserisassanut ilaatinneqartarsimasumi pitsannguutissatut iluarsiissutissatullu kissaatigisat amerlanersaat anguneqarsinnaasimapput.

Attaveqaatinut Naalakkersuisoqarfik tusagassiorfinnut nalunaaruteqarnermi ilisimatitsivoq.

Kiffartuussinermut isumaatigiissutit pitsannguutinik aalajangersimasunik ukuninnga imaqarput:

1. januar 2021 aallarnerfigalugu nunatsinni qulimiguulinnik assartuussinerit tamarmik Air Greenlandimit tiguneqassapput. Tamatuma kingunerisaanik silaannakkut assartuussinermut bilitsinik ataqatigiissunik Air Greenlandimut pisisoqarsinnaalissaaq.

Air Greenland qulimiguulinnik Airbus H155-inik, Bell 212-inut taartissanik nutaaliaasunik pisissaaq.

Qeqertarsuup Tunuani, Kalaallit Nunaata qeqqani aamma Kalaallit Nutaata kujataani imaatigut angallassineq suli Disko Line-mit isumagineqassaaq, aammalu najukkani sullissisuutitanit amerlasuunit, ullumikkut suliassanik isumaginnittuusunit isumagineqassalluni. Bilitsit suli Disko Line-mit pisiarineqarsinnaassapput.

Kalaallit Nunaata kujataani angallatit sikusiutit sukkasuuliat nutaat, 36-nik ilaasoqarsinnaasut atorneqalissapput – taakku hybrid-iunissaat ilimanarpoq. Taamaalilluni nunap immikkoortuani isumannaassuseq, ilorrisimaarsinnaaneq pisinnaasallu annertusissapput.

Targa sila ajortinnagu angalasartussaq Nanortalimmut aalajangersimasumik inissinneqassaaq.

Norlandair-ip Nerlerit Inaannut timmisartuussisarnera Nerlerit Inaata aamma Reykjavik-ip akornanni qaammammut marloriarluni toqqaannartumik attaviliinikkut pitsannguiffigineqassaaq, tamatumalu kingunerisaanik Islandimut unittarnerit ikilissapput, kiisalu Kulusuup aamma Nerlerit Inaata akornanni attartorluni timmisartuussisoqarsinnaalissaaq.

Distriktini kiffartuussinermik isumaqatigiissuteqarfiusuni nunap immikkoortuani mittarfinnik sanaartornerit ilutigalugit isumaqatiginninniaqqinnissamut periarfissat tamakkiisumik eqaassuseqalissapput.

Bilitsit, allakkat nassiussallu ullumikkut akiinut naleqqiullugit qaffaasoqassanngilaq – taamaattorli aningaasat nalingisa nikerarneri akillu ineriartorneri malillugit ingerlaavartumik iluarsiisoqartassaaq.

Bilitsinut annaasanut qulakkeerinissaq, kiisalu inissinneqarnerup nerisaqarnerullu sullissisunit akilerneqartarnissaat, taakkulu siunissami angalasut sumiluunniit najugaqaraluarpata atuutsinneqalissapput.

Kangerluk Qeqertarsuarmi inissisimasoq siullermeerluni kiffartuussinermut isumaqatigiissuteqarfiusunut ilanngunneqarpoq, piffissamilu imaatigut angallaviusumi tassanngaanniit qaammammut marloriarlunilu aallartoqartassaaq. Kiisalu ukiuunerani attartornermut piumasaqaatit atorlugit qaammammut marloriarluni qulimiguulimmik assartuussisoqartassaaq.

Qeqertat nunaqarfittut inissinneqassappat ilanngunneqassaaq.

Biitsit sapaatip akunnerata tullianiit pisiarineqarsinnaalissapput

Attaveqaatinut Naalakkersuisup Karl Frederik Danielsenip (S) tallimanngornermi tusagassiortunik katersortitsinermi ilimatitsissutigaa, bilitsi sapaatip akunnerata tulliani pisiarineqarsinnaaleriissasut.

Naalakkersuisut naatsorsuutigaa isuaqatigiissut ataasinngorpat marlunngorpalluunniit atsiorneqassasoq, tamatumalu kingorna 2020-mi decembarip 31-ata kingorna atuuttussamik bilitsisisoqarsinnaanngussasoq.