Kiffartuussinissamut isumaqatigiissutini iluarsisassat IA-p iluarsiniarpai

Angallanneq ataqatigiinngitsoq.

Bilitsit akisunerusut.

Kiffartuussineq ajornerusoq.

Suliffinnillu annaasaqarneq.

Qiimmatsanngitsoq
Inuit Ataqatigiit partiip illuatungiliuttup angallannermut kiffartuussinissamut isumaqatigiissutit nutaat, marlunngornermi Inatsisartut Aningaasaqarnermut Akileraartarnermullu Ataatsimiititaliaanit akuerineqartut qiimmatsaatiginngilai.

Atuaruk: Ilaasut timmisartorlutillu umiarsuartassapput

Partiip tassani tikkuarpaa, angallanneq Disko Linep aamma Air Greenlandip akornanni avinneqarnissaat naleqqutinngitsoq.

Ingerlatseqatigiiffiit arlallit
- Nunaqarfinni illoqarfinnilu minnerni innuttaasut qulimiguulinnik angallanneqarnissamut billetsigunik illoqarfinnit anginernit ingerlaqqinnissamut attavissanut ataqatigiissagaanngitsumik inissisimalertussaapput, partiimi siulittaasoq Sara Olsvig taama naqissusiivoq.

- Akuersaanngilarput ingerlatseqatigiiffiit akornanni ataqatigiissaarinissamik innuttaasunillu kiffartuussinissamut suleqatigiinnissamik Naalakkersuisunit piumasaqartoqarsimanngimmat, taanna oqarpoq.

Aaqqissuussinerup nutaap aamma kingunerissavaa, ilaasut timmisartumut ilaaffissartik angumerinngitsoorunikku ukiortaamit nerisaqarnertik unnuinertillu namminneq akilertalissavaat. Saniatigillu bilitsimik allanngorsinnaasumik pisisimanngikkuni bilitsertik annaasassavaat.

Atuaruk: Air Greenlandip atorfiit 45-t peertariaqarpai

Isumaqatiginninniutigeqqinneqassasut
Inuit Ataqatigiit maanna neriuutigaat, isumaqatigiissut isumaqatiginninniutigeqqinneqarnissaanut Inatsisartuni partiit akornanni taperserneqarsinnaassasoq.

- Inuit Ataqatigiit piareersimavugut aaqqiinissamut aqqutissiuussinissamut Naalakkersuisunut piumasaqarnissamut Naalakkersuisooqatigiillu partiivinut kaammattuuteqarpugut tamanna pillugu politikkikkut oqaloqatigiinnerit aallartissasut, Sara Olsvig ilanngullugu oqarpoq.

Partiit illuatungiliuttut aamma pitsanngoriaatit arlallit nersualaarutigaat, minnerunngitsumik meeqqanut pensiuunisialinnullu bilitsinut tunngatillugu.

Atuaruk: Kiffartuussinissamut isumaqatigiissutit maanna inissipput