Kiffartuussinissamut isumaqatigiissuteqannginnera takornariartitsisartunut ajoqusiissaaq
Qasigiannguani takornariartitsisartup takornariartoriniakkani oqaluttuussinnaanngilai, ukiortaareerpat orninniakkaminnut qanoq ilillutik apuussinnaanerat, ilaasunimmi angallassinissaq eqqarsaatigalugu kiffartuussinissamut isumaqatigiissummik nutaamik suli saqqummiussisoqarsimanngimmat.
Ilaasunik angallassinissaq eqqarsaatigalugu kiffartuussinissamut isumaqatigiissut maanna atuuttoq ukiortaami atorunnaassaaq, Naalakkersuisullu isumaqatigiissumik nutaamik suli saqqummiussisimanngillat.
Taamaammat nunami maani ukiortaareerpat ornitassarpassuarnut angallassinissami atugassarititaasut ilisimaneqanngillat.
Tamanna Qasigiannguani takornariartitsisartup Frank Larsenip uggorilluinnarpaa:
- Qimussiussisarnissatsinnut aaqqissuussisinnaannginnerput uagutsinnut annertuumik tatisivoq, Frank Larsen Qasigiannguani Diskobay Toursimik ingerlatsisoq oqarpoq.
Diskobay Tours ilaatigut ukiuunerani qimussiussisarpoq, Qasigiannguanullu angallassinissaq kiffartuussinimut isumaqatigiissummut ilaammat, Frank Larsenip ingerlatsinissaanut isumaqatigiissutissat nutaat qanittukkut aaqqiiffigineqarnissaat pisariaqartilluinnarpaa.
Nammineq periusissiarisamik malinninnginneq
Frank Larsen oqarpoq, Naalakkersuisut namminneq takornariartitsisarnermut periusissiartik malinngikkaat, periusissiamimi allassimavoq kiffartuussinissamut isumaqatigiissutissat takornariartitsisartut eqqarsaatigalugit piffissaagallartillugu isumaqatigiissutigineqartassasut.
- Taamaakkaluartoq suli aaqqiissuteqartoqanngitsoq isumaqatigiissutit atorunnaarnissaannut qaammati pingasuinnanngorput, taanna oqarpoq, takornariartitsisartullu qisuariaataa erseqqippoq:
- Pakatsinaqaaq. Kalaallit Nunaanni takornariarfiunerpaasartut saniatigut takornariarfiusinnaasunik amerlanernik pilersitsisoqarnissaanik neriorsorneqarsimavugut, taamaammat sumiginnarneqarsimasutut misigisimavugut. Coronallu tuniluunneratigut eqqugaanerloreeqqasugut immikkut suli artukkerpaatigut, Frank Larsen oqarpoq.
Naalakkersuisoq: Isumaqatiginninniarneq suli ingerlavoq
Sermitsiaq.AG-mit Ineqarnermut Attaveqaatinullu Naalakkersuisoqarfik aperineqarsimavoq, kiffartuussinissamut isumaqatigiissutit nutaat qaqugukkut pissarsiarineqassanersut, sulili akissuteqartoqarsimanngilaq.
Sapaatip akunnerani matumani Inatsisartunit apeqqarissaartoqarmat, Naalakkersuisup Karl Frederik Danielsenip ilisimatitsissutigaa isumaqatigiissutissat suli isumaqatiginninniutigineqartut.