Kiffartuussinissamut isumaqatigiissut utertissavarput

Ane-Lone Bagger Washington DC-mi Senatimi politikerinik marlunngormat ataatsimeeqateqarami taama oqarpoq

Ane Lone Baggerip Senatimi 'Arctic Caucus'-imi siulittaasoq Lisa Murkowski Alaskameersoq naapippaa

Ilinniartitaanermut, kultureqarnermut, ilageeqarnermut nunanullu allanut tunngasunut naalakkersuisoq Ane-Lone Bagger politikerit nuimasut atorfilittallu arlallit Washington DC-mi, USA-mi sapaatip akunnerani matumani marlunngormat ataatsimeeqatigigai, Namminersorlutik Oqartussat aviisumut Sermitsiamut ilisimatitsissutigaat.

Senatimi ”Arctic Causus”-imi, senatimut ilaasortat arlallit politikikkut oqallittarfianni, Ane Lone Bagger suleqatigiissutigineqarsinnaasut pillugit ataatsimeeqatigineqarpoq. Sammisat soorlu takornariaqarneq, aatsitassat ilinniartitaanerlu oqallisigineqarput, aamma Kalaallit Nunaata nunarsuup ilaani politikikkut ineriartornermut isummersorneranut soqutiginnittoqarluarpoq.

Nunatsinnut pingaarutilik

Washingtonimi politikerinik atorfilittanillu ataatsimeeqateqarnermi pingaarutilittut oqariartuutigineqartut ilagaat Pituffimmi kiffartuussinissamut isumaqatigiissut. Ilaatigut nunanut allanut tunngasunut naalakkersuisup tikkuarpaa, Pituffimmi kiffartuussinissamut isumaqatigiissut suliffeqarfinnit nunamit maaniittunit isumagineqaleqqittariaqartoq.

- Politikerinik Senatimut ilaasortanik atorfilinnillu qulliunerusunik ataatsimeeqateqarninni kiffartuussinissamut isumaqatigiissutip pingaarnertut saqqummiunnissaa siunniussimavara, taamaalilluta taassuma Kalaallit Nunaanni najugaqartunut suliffeqarfinnut sulisartunullu iluaqutaanissaa qulakkeersinnaaniassagatsigu. Maanna malugisinnaasatsitut politikerit atorfilittallu kiffartuussinissamut isumaqatigiissutip Nunatsinnut, ingammik nunamik sakkutooqarfeqartitsisuusumut qanoq pingaaruteqartiginera paasiartulerpaat. Taamaalilluni kiffartuussinissamut isumaqatigiissutip Kalaallit Nunaannut iluaqutaasussatut ilisarnaataanera paasineqarnerulerpoq aamma qulliunerusut akornanni, Ane Lone Bagger Sermitsiamut tikkuaavoq.

Allaaserineqartoq aviisimi Sermitsiami tamakkiisumik atuaruk. Aviisi uani pisiarineqarsinnaavoq:

Powered by Labrador CMS