Kiffartuussinermut isumaqatigiissutit nunaqavissunut aallarnisaasunut iluaqutaanngitsut
Ilaasunik angallassinermi kiffartuussinermut isumaqatigiissutit nutaat, nunaqavissut aallarnisaasut ilaasunik angallassinermik suliaqartut ineriartornissaannut aporfilersuisut, aallarnisaasoq kommunalpolitikerilu isumaqarput.
Ilaasunik allakkanik nassatanillu kiffartuussinermut isumaqatigiissutit pillugit 6. november Naalakkersuisut Air Greenland A/S, Disko Line A/S, Norlandair aamma Arctic Umiaq Line A/S, 1. januar atuutilertussamik isumaqatigiissuteqarfigaat. Ukiunut qulinut atuuttussamik isumaqatigiissuteqarnikkut innuttaasunik sullissinerup malunnaatilimmik pitsaanerulertinneqarnissaa siunertaasoq, kiisalu inuussutissarsiornermik suliaqartut, soorlu takornarialerisut, siumungaaq pilersaarusiorsinnaanissaat aningaasaliissuteqarsinnaanissaallu anguniarneqartoq, Ineqarnermut Attaveqatigiinnermullu Naalakkersuisoq, Karl Frederik Danielsen, Siumut, oqarpoq.
Aviisi Sermitsiaq taama allappoq.
Qeqertarsuup Tunuani imaatigut allakkanillu angallassinermut tunngatillugu, Danmarkimi najugaqartunit pigineqartoq, tamakkiisumillu angalatitsiveqatigiiffimmit Topas Explorer Group Aps-imit pigineqartoq, Disko Line A/S, angallassisartussatut isumaqatigiissuteqarfigineqaqqippoq. Ukioq manna tikillugu Disko Line-p Qeqertarsuup Tunuani qulimiguulimmik angallassineq tigumminikuugaluarpaa, ukiorli nutaaq aallarnerfigalugu Air Greenland-ip ukiuunerani silaannakkut angallassineq tigussavaa.
Suliffeqarfiit isumaqatigiissuteqarfigineqartut atoqqinniarneqarmata, ilisimasaallu iluatigineqarmata, taakku kisiisa aammaartumik toqqaannartumik isumaqatigiissuteqarfigineqartut, taamaattumillu suliariumannittussarsiuussisoqanngitsoq, Naalakkersuisut oqaatigaat.
Angallassinissamulli isumaqatigiissutit suliarineqarnerannut atatillugu, nunaqavissut namminersortut ilaasunik angallassinermik suliaqartut, Naalakkersuisuniit isiginngitsuusaarneqartut, Qasigiannguit Tourism & Charter-imik piginnittoq, 27-nik ukiulik Annguaq Jerimiassen isumaqarpoq.
Aviisimi Sermitsiami atuarnerusinnaavutit: