Kiffaanngissutsip sineriaanut alloriarneq
Lars-Emilip inatsisinut tunngaviusussamut siunnersuummut inuit isumaasa tusarnissaat qilanaaraa, namminerli suliassap ingerlanissaanut sunik naatsorsuuteqarpa – aamma maanga killilluni qanoq misigisimanarpa?
Lars-Emil Johansenip 76-inik ukiullip, isigiarsuttuunini pissutigalugu Inatsisit Tunngaviusussatut siunnersuut suli atuaqqissaarsimanngilaa. Pilersaarulli erseqqissumik takorloorsinnaavaa.
Inatsisit Tunngaviusut kuup illuatungaanut pissinnissamut isissutaasinnaapput. Tassa namminiilivinnissamut matuersaatissarput, taanna aviisimut AG-mut oqarpoq.
Oqaaseq ”tulleqqat” Naalakkersuisut siulittaasorisimasaata namminiilivinnissap tungaanut ingerlaarnermi atorajuttarpaa. 1979-imi namminersornerulerneq tulleqqani siulliuvoq. Namminersorneq alloriarneq tulliuvoq.
Inatsisit Tunngaviusut tassaapput tulleraq immikkut ittoq, kiffaanngissutsimut ikaarsaarnermi pissinnerup angivallaannginnissaanut iluaqutaasussaq, taanna oqarpoq.
- Alloriarneq kingulleq qaqugu piumaarpa?
- Tamanna sukkasoorujussuarmik pisinnaavoq imaluunniit sivisoorujussuarmik utaqqissunneqarsinnaalluni. Namminersornerulernitsinnit ukiut 40-t sinneqartut – namminersulernitsinnillu ukiut 14-it qaangiutereerput. Taamaalilluta arriisaarluta tuaviortarnerput ileqqoraarput, akivoq.
- Suliassap ingerlateqqinnissaa qanoq takorloorpiuk?
Inatsisit Tunngaviusut inuiaat inatsiseraat. Taamaalilluta siullertut innuttaasut siunnersuut oqallisigeqqaassavaat, tamatumani allannguutissanik, pitsanngoriaatissanik tapiliussassanillu siunnersuuteqartoqarsinnaassalluni. Tamatuma ukiunik marlussunnik sivisussuseqarsinnaanera naatsorsuutigisinnaavarput tamatumalu kingorna Inatsisartunut ingerlateqqinneqassalluni.
Aviisimi AG-mi atuarnerusinnaavutit. Aviisi uani pissarsiariuk:
