Skip to main content

Kielsen: Ukioq manna Kalaallit Nunaanni pissartanngorniuttoqassanngilaq

Katersuunnissamut inerteqquteqarneq 2021-mi januaarip 31-ata tungaanut sivitsorneqarput, tamatuma malitsigisaanik ukioq manna Kalaallit Nunaanni pissartanngorniuttoqassanngilaq, Kim Kielsen oqaluttuarpoq

Katersuuteqqusinnginnermut malittarisassat attatiinnarneqarput, ukiullu nutaap aallaartinneranut sivitsorneqarlutik. Malittarisassat malillugit, aaqqissuussat kommuninit assigiinngitsunit peqataatitaqartussat ingerlanneqarnissaat inerteqqutaapput.

Tamatumunnga pissutaatinneqarpoq, taamatut aaqqissuussisoqarnerani ajornerpaamik pisoqassappat Kalaallit Nunaanni tuniluuttoqalersinnaanera.

Naalakkersuisut Siulittaasuata Kim Kielsenip aamma Nunatsinni Nakorsaanerup Henrik L. Hansenip tallimanngornermi ullup-qeqqata kingorna tusagassiortunik katersortitsinermi tamanna oqaluttuaraat.

- Nunami sumiiffinni assigiinngitsuni tuniluuttoqaleriasaarsinnaanera assorsuaq eqqarsarnartoqartipparput. Taamaammat Naalakkersuisunit kaammattuutigaarput, nunamit tamarmit peqataatitaqartumik aaqqissuussisoqartillugu mianersorluartoqarnissaa.

- Taamatut aaqqissuussisoqarnerani nunami tamarmi tuniluuttoqaleriaannaavoq. Taamaalisoqarpallu napparsimasoqalersinnaanera toqusoqarsinnaaneralu pinngitsoortikkuminaalluinnassappput, Nunatsinni Nakorsaaneq Henrik L. Hansen oqarpoq.

Politikkikkut ataatsimoorluni aalajangiineq

Kim Kielsenip oqaluttuaraa, politikikkut ataatsimoorluni aalajangiisoqarneratigut malittarisassat sivitsorneqartut, taamalu timersortartut ukioq manna pissartanngorniuttoqannginnissaa akuersaartariaqaraat:

- Ukioq manna Kalaallit Nunaanni pissartanngorniuttoqassanngilaq. Badmintonimi, wolleymi, arsaannermi assigisaannilu. Inuit ataasiakkaat peqqissusaat pingaaruteqarnerpaavoq.

- Tunngaviuvoq peqqinnissaqarfiup upalungaarsimasullu eqqarsaatigineqarnissaat. Peqqissuseq matumani qitiutinneqarpoq, Kim Kielsen tusagassiortunik katersortitsinermi oqarpoq.

Katersuuteqqusinnginnermi silami inuit amerlanerpaamik 100-t illullu iluani amerlanerpaamik 250-it katersuussinnaapput.

Atuarfinnut atuutinngitsoq

Malittarisassat atuarfinnut, meeqqerivinnut ilinniartoqarfinnullu atuutinngillat.

- Atuarfiit nalinginnaasumik ingerlassapput. Tamanna inuiaqatigiinni tuniluuttoqannginneranut iluaqutit ilagivaat, Nunatsinni Nakorsaaneq Henrik L. Hansen oqarpoq.

Nunatsinnili nakorsaanerup kaammattuutigaa, innuttaasut assersuutigalugu ullormi atualeqqaarfissiortoqarneranut atatillugu kaffillertoqarnerani mianesortoqassasoq.

Assersuutigalugu sila ajunngippat silami kaffillertoqarsinnaavoq, aamma eqqiluisaarnissaq eqqaamaneqassaaq, nunatsinni nakorsaaneq oqaluttuarpoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER