Kielsen: Qaqortumi mittarfiliorneq aallartilli
Siumumiit Kim Kielsenip Qaqortumi maanna mittarfissualiortoqarnissaa kissaatigaa. Nunatta sumiiffimmi mittarfiliunnginnissaq akissaqarfiginngilaa, sanaartortitsineq siunissaq ungasinnerusoq eqqarsaatigalugu aningaasarsiutaalissammat, isumaqarpoq.
Nunarput pingaartumillu Kommune Kujalleq ineriartortinneqarnissamik pisariaqartitsipput. Qaqortumilu mittarfissaq nunatsinnut aningaasanik isaatitsilertussaavoq, suliffissaqartitsilissalluni kiisalu ilinniarfeqarfittut atulersinnaalluni.
Kim Kielsen Siumumeersoq taama isumaqarpoq erseqqissaallunilu Qaqortumi mittarfiliornissap piviusunngortinnissaanut aningaasanik nassaarnissamut partii suleqataanissamut piareersimasoq.
Kim Kielsen isumaqarpoq Kujataa mittarfimmik 1499 miiterisut takitigisumik peqaleruni iluanaarnerussasoq. Mittarfimmi naannerussappat takornariat ikinnerusut aamma tikittassammata.
Aningaasaliinerit akilertarput
- Isertugaataanngilaq mittarfiliorneq akisoorujussuusoq, aningaasarpassuarnillu naleqarluni. Taamaattoq mittarfiit ukiut 50-it 100-llu tulliuttut atorneqarsinnaasussaapput, Kim Kielsen tusagassiorfinnut nalunaarutimini allappoq.
Naatsorsuinerit kingulliit takutippaat mittarfissat naatsorsueqqaarnermit akisunerussasut. Qaqortumilu mittarfiliornissamut suliariumannittussarsiuussineq aamma persuatitsivoq, sanaartorniarlutik suliariumannikkumasut aningaasanik atorneqartussanik sippuingaatsiartussatut isikkoqarmata.
- Piffissami kingullermi tusagassiutitigut nalunaarutigineqarpoq mittarfik 1 milliardit koruuninik sinnerlugit akeqassasoq, ilaasalu apeqquserpaat ilumut tamanna akissaqartinneripput? Tassunga qussalasumik akisariaqarpunga aap! Akissaqanngilagut sananngitsoornissaanut, Kim Kielsen oqarpoq.
Takornariaqarneq inuussutissarsiornerlu
Qaqortumi mittarfiliornissaq naatsorsuutigisamit akisunerussagaluartoq, taamaattoq Kim Kielsen isumaqarpoq sanaartorneq nunatta karsianut siunissaq ungasinnerusoq eqqarsaatigalugu iluanaarutaassasoq.
Taassuma tikkuarpaa takornariaqarneq eqqarsaatigalugu aningaasanik isaatitsinissamut missingersuutit sapinngisamik minnerpaaffissamiitinneqartut, taamaasillunilu mittarfiliornissaq akisunerusutut isikkoqalerluni.
Takornariat inuussutissarsiornermilu periarfissat mittarfiliornermut aningaasartuutinut siunissaq ungasinnerusoq matussusiisinnaapput iluanaarutaalerlutillu.
- Mittarfik akilerneqareerpat ukiut 50-it tulliuttut sinnerlugit nunarput aningaasanik isaatitsilissaaq, oqarpoq.
Nalunaarummini ilanngullugu oqaatigaa sanaartornissaq kinguarsarneqartuarpat Kujataani inuussutissarsiornerup iluani siuarsaarusuttut illoqarfinnut allanut nuunginnarnissaat kingunissaassasoq.