Kielsenip puigutunera

Kanukokap matunera: - Vittus Qujaukitsoq peersitsisuuvoq, borgmesterinit Siumukkormiunik pingasunit aqqutissiuunneqarluni, Asii Chemnitz Narup oqarpoq.

Naalakkersuisut siulittaasuata Kim Kielsenip nunatsinni kommuneqarfiit kattuffiata Kanokokap matusimanera ajuusaarutigaa, tamannalu oqaatigaa Inatisartut ataasinngormat 2009-mi kommunit aaqqissuuteqqinneqarnerat oqaluuserimmassuk.

Aviisi Sermitsiaq taama allappoq.

- Kanukokap matuneqarnera pitsaanngitsunik kinguneqarsimavoq, pingaartumillu Naalakkersuisunut ataatsimoorluni inassuteqaateqarnissaq kommunit ajornakusoortissimavaat, Kim Kielsen oqarpoq.

Kanukoka 2018-imi juulip 31-ianni atorunnaarsinneqarpoq, kommunillu ataatsimut soqutigisaminnut katersuuffeqannginnerat Kim Kielsenip sanngiissutitut oqaatigaa.

- Naalakkersuisut neriuutigaat ajornartorsiummut tamatumunnga kommunit ataatsimoorlutik aaqqiissutissarsiumaartut, Kim Kielsen oqarpoq, taasumalu aamma nunap iluani pissutsit politikkikkut akisussaaffigai.

Kim Kielsenilli ataasinngormat Inatsisartuni oqaluttuarissallugu puigorpaa nammineq partiimi Siumup Kanukoka atorunnaarsissimagaa.

Naligiissaarineq ajornartorsiortitsivoq

Kanukoka 1972-imi juulip 24-ianni pilersinneqarpoq, kommunimullu akileraarut 1975-imi januaarip aallaqqaataani eqqunneqarluni.

Kommunit assigiinngeqisunik angissusillit akileraarutitigullu assigiinngitsunik tunngavissallit akornanni atugarissaarneq naligiinnerusoq pilersinniarlugu naligiissaarinermut aaqqissuussineq eqqunneqarpoq, taamaasilluni akileraarutitigut isertitat ilaat kommuninit pisuunit kommuninut piitsunut nuunneqartarlutik.

2013-imi marsip 12-ianni qinersinerup kingorna Naalakkersuisut nutaat naligiissaarinermut malittarisassat kommuninullu ataatsimut tapiissutit allanngortikkusuppaat, suliassarli annertusimavoq, 2014-imiillu atuutilernissaannut inatsisitigut tunngavissat angumersissunneqarsinnaasimanngillat.

Taamaattumik Kanukokap siulittaasuata aamma aningaasaqarnermut nunanullu allanut tunngasunut Naalakkersuisup Vittus Qujaukitsup, marluullutik Siumut, 2013-imi juulip 3-anni 2014-imut kommuninut ataatsimut tapiissutinut isumaqatigiissut atsiorpaat, tassuunakkullu aningaasat kommuninut agguarneqarnerat allanngortinneqanngilaq. Kingorna Kanukokap siulersuisuisa ataatsimiinneranni isumaqatigiissut atsiorneqarsimasoq oqaaseqarfiginagu tusaatissatut tiguneqarpoq.

Aviisimi Sermitsiami atuarnerusinnaavutit - ugguuna pissarsiariuk:

Powered by Labrador CMS