Kielsenip pisassiissuteqarnera nammineq aniguinissamik qulakkeerinnittoq
Siumut iluani eqqissiviilliorneqaraluartoq Siumumi qinikkat Kim Kielsenimut Naalakkersuisunullu tapersersuipput tallimanngornermilu unnukkut tatiginninnginnermik taasisitsinermik pinngitsoortitsillutik. Kielsen oqallinnermi pisassiissuteqarnissamik neriorsuisariaqalerpoq tunuliaquttaminik ataatsimoortitsisinnaaniarluni
Ukiakkut ataatsimiinnermi ullormi ataatsimiiffiusumi kingullermi partiit naalakkersuisoqataasut aamma partiip ikorfartortaasup Demokraatit illuatungiliuttullu akornanni isumaqatigiinnginneq oqallinnermi sakkortulluinnartumi misigissutsinillu aalassatsitsilluinnartumi ersersinneqarpoq.
Taavalu aamma Atassut Inatsisartullu siulittaasuata Vivian Motzfeldtip akornanni akerleriittoqarluni. Tamannalu uterfigissavarput.
Misilitsinneq
Hans Enoksenip tatiginninnginnermik taasisitsinissamik oqaluuserisassanngortitsinerata Siumut avissaartuutsissinnaanngilaa, tamatumanilu politikerit qanoq ilumoortiginerminnik misilinneqarput Kim Kielsenip Naalakkersuisunik aqutseriaasianik naammaginninnginnermik saqqummiussisoqaqattaartoqareersorlu.
Siumup siulittaasua Karl-Kristian Kruse, Siumumut ilaasortaanerup qanoq iluaqutaatigineranik sisamanngornermi takujuminaatsitsilersimasoq, allatut eqqarsalersimagunarpoq, Naalakkersuisunullu pisassiissuteqartarnikkut isumaqatigiissuteqarsimanini ersersimisaarlugu.
Tunuliaqutaasoq
Hans Enoksenip tatiginninnginnermik taasissutiginninnissamik oqaluuserisassamik saqqummiussisinnaanngorneranut oqaluuserisassaq nukinnginnartumik ilanngunneqartoq Erik Jensenip Naalakkersuisunit tunuarniuteqarnerata akuerineqarfigisassaa pissutaavoq.
Erik Jensen ulloq taanna siusinnerusukkut Sermitsiaq.AG-mut ersarissuliorluni Kim Kielsenip Naalakkersuisunik aqutseriaasianik naammaginninnginnerminik saqqummiussaqarsimavoq, nalunaarsimallunilu partiip siulittaasussaatut sassarnissaminik pilersaaruteqarluni pisariaqassappallu Siumup aappaagu juulimi tullissaanik ataatsimeersuarnissaani Kim Kielsenimut siulittaasunngorniarnermi unammillissalluni.
Illuatungiliuttut – pingaartumik IA-mit, Partii Naleqqamit Suleqatiigiissitsisunillu siuttuuffigineqartut – iliuuseqarasuarput Hans Enoksen tatiginninnginnermik taasisitsinissamik oqaluuserisassamik saqqummiussimmat.
Piffissamik eqqueriaaneq
Akitsuutinik qaffaanerit akerleralugit akerliussutsimik takutitsinersuit eqqorluarlugit qanoq iliuuseqarnissaq illuatungiliuttut nutaamik nukissaqalissutigaat, qinersinerup piviusunngortinneqarfigisinnaasaanik Siumup iluani avissaartuutsitsilernissamut periarfissamik takusaqarlutik.
Oqallinneq Kim Kielsenip Naalakkersuisunik aqutsineranik kamaatiginninnermik narrujuummiutiginnissimanermillu qulaarivoq.
Naalakkersuisut siulittaasuat illuatungiliuttunik ataatsimoortitsinissamut taarsiullugu naalakkersuinikkut namminersuutigilluinnaminik ingerlatsivoq – Demokraatinik peqateqarluinnarluni.
Atassut utaqqimaartoq
Atassutilli siulittaasua qinigaarlaaq Aqqalu Jermiassen utaqqimaarpoq, akunnerni arlalinni oqallittoqareersorlu tassanngaannaq nalunaarami, marrarmik milluuinermik taasaminut peqataarusunnani, taamaattumillu taaseqataaniarnani, tamannalu pinngitsoortitsiniarluni oqaluuserisassanngortitsinerup pisariaqartunik amerlanerussuteqarfiuneranik qulakkeerinnilluni.
- Qanorsuarluunniit nilliallutalu suaartartigigaluarutta ikinnerussuteqarpugut, kisianni illuatungiliuttuunerup assiginngilaa, illuatungiliuttut maleqqissaartuaannarneqassasut, Atassutip siulittaasua oqarpoq.
Taannali Siumumeersumit Henrik Fleischerimit ima puffaammertinneqartigaaq kingusinnerusukkut ima nalunaarluni:
- Taaseqataannginnissamik oqaaseqarnerigaluara atorunnaarseriaannanngorpara, Aqqalu Jermiassen, oqalliseriaatsimit sakkortuumit, tv-eeqarfinni tamanut kiffartuussiviusuni tamani meeqqanut aqqaneq-marluk ukiulinnut inerteqqutaasariaqaraluartumit, sunnerneqarsimasoq, oqarpoq.
Kim Kielsen oqaaseqartoq
Kim Kielsen oqallinnerup naajartulernerani oqaaseqarpoq.
-
Naalakkersuisoq ataaseq tunuarniuteqarmat akueraara. Pissaaneq pinnguaanngilaq. Ikinnerussuteqartut tusaaneqanngikkaangat “matoqqaneq, matoqqaneq” oqartoqartarpq. Inoqarfiit 34-t tikissimavavut ammasumik ingerlatsigatta. Soorunami isertuussassanik paasissutissaqaraangat taakkua isertuussassaanerat tunngavigalugu suliarisarpavut. Tamanna pisussaaffigaarput inatsisit naapertorlugit. Nunamik ingerlatsisinnaanermut tamanna tunuliaqutaavoq. Pisussaaffivut najoqqutaralugit ingerlatsivugut, Kim Kielsen oqarpoq.
- Ikinnerussuteqartut siunnersuutaat aningaasanik nalillit qassimmitaava akuerineqarpat. Tassa pisussaaffivut najoqqutaralugit ingerlatsivugut. Taannalu mamigineqarpat tassa aajuna periarfissaq, siulittaasoq oqarpoq, taassuminngalu tatiginninnginneq oqallinnermi tamarmiusumi tunngavigineqarpoq.
Pisassiissuteqarnissaq saqqummiuneqartoq
Kim Kielsen Karl-Kristian Krusemit aalisarnermi pisassiissuteqarnermut tunngasut iserfiginissaannik tatineqarpoq. Kielsen allanngortitsinissamik neriorsuisariaqalerpoq, Krusemit Hans Enoksenimillu eqqissiallaatigineqartumik. Krusep Siumumut ilaasortaaginnarnissaminut siusinnerusukkut nalornissutiginninneralua taamaalilluni tunngavissaaruttoq, akunnerni arlalinni oqallittoqareersorlu nalunaarpoq.
Maliaqerpalaaq
Ukiakkut ataatsimiinnermi ullormi ataatsimiiffiusumi kingullermi tassaarsuarmut assingusumik pissanganartumik misigisaqartoqarpoq, akunnerit pingasut sinnerlugit oqalittoqareersorlu maliaqerpalaaginnannguuttumik, ullorlu taanna aqutseriaaseq, akitsuutit, matoqqaneq politikkikkut tatiginassuseq pillugit kamassimarpaloqisumik nipeqarfiusimasutut eqqaamaneqartussanngorluni.
Taavali pisassiissuteqarnissamut tunngasumik Siumup siulittaasuata tullianut tunuliaquttaminik Uummannameersunik illersuinniarluni sukataarutiginnittumut saqqumiussisoqarpoq, taamaalillunilu inuuneq tassanngaannaq kamassimaarfiujunnaarluni saammisaarfinngorluni – akitsuutinik qaffaanerit eqqarsaatigalugit eqqarsaatiginagillu.
Allamut sangullatsiarneq
Oqallinneq tamaat eqqarsaatigalugu allamut sangullatsiarneq tassaavoq Inatsisartut siulittaasuata Vivian Motzfeldtip akuliuttarnera, taassumami illuatungiliuttut oqaluuserisamik qimatsinaveersaartippai, tamannalu illuatungiliuttuni politikerinit arlalinnit akueriuminaatsinneqaqaluni. Taamaalillutik oqaaseqaatigineqartut ilarpaalussui pinngitsoortitsiniarluni oqaluuserisassanngortitamut samminatik Vivian Motzfeldtimut samminerupput.
Demokraatineersup Justus Hansenip Vivian Motzfeldtimut saassussisarnerit ataatsimiinnermik aqutsinermut ataqqinninnginnertut oqaatigai erseqqissaallunilu, inersuarmiittut oqartussaaqatigiinnerup anersaavani amerlanerussuteqartut aalajangiinerat aappaagumut aningaasanut inatsimmut tunuliaqutaasoq akuerisariaqaraat.
Ilaasortat arlallit najuutinngillat, taamaattumik taasisitsineq ima inerneqarpoq: pinngitsoortitsiniarluni oqaluuserisassanngortitamik tapersiillutik taasisut 14-it akerliusulllu 11-t.
Inatsisartut siulittaasuat naggataatigut saammaasserpalaartumik nipeqarluni juullisiorluarnissamik kissaassisinnaanngorpoq.
Ukiakkut ataatsimiinneq taamaalilluni naammassivoq.
Oqallinneq pillugu atuaruk: Kruse pinngitsoortitsiniarluni oqaluuserisassamik saqqummiussisoq
Tatiginninninnginneq pillugu atuaruk: Kielsenimut tatiginninnginneq