Skip to main content

Kielsenip Niels Thomsen siulersuisuni atuuffimmik pilerinartumik tunigaa

Demokraatit Niels Thomsenimik siuttoqarlutik Kim Kielsenip Nuummi Ilulissanilu timmisartoqarfissuarnik nutaanik sanaartornissamik anguniagaqarneranut tapertaalluarsimapput. Niels Thomsen Kalaallit Airportsip siulersuisuini ilaasortanngortinneqarluni maanna akilerneqarpoq.

Kim Kielsen Namminersorlutik Oqartussat ingerlatseqatigiiffiutaasa siulersuisuini nutaanik ilaasortanngortitsisarluni suliaqarnerminik suli naammasseqqajanngilaq. Siullermik Visit Greenlandip siulersuisuini ilaasortat pingasut soraarsinneqarput pingasunillu allanik taarserneqarlutik, tamatuma kingorna Illuut A/S-ip siulersuisuini ilaasortat pingasuusut tamarmik taarserneqarput, maannalu Kalaallit Airportsip silersuisuini taarsiisoqarluni, tassani kalaallit siulersuisuni ilaasortat sisamaasut affaat taarserneqarlutik.

Naalakkersuisut apriilip aappaani aalajangerput, ingerlatseqatigiiffinni taakkunani pingasuusuni immikkut ittumik ataatsimeersuartoqassasoq. Siulersuisut ilaasortaannik taarsersuinissaq nukinginnarpasissimasutut isikkoqarpoq. Ullormimi tassani Visit Greenlandip inissiaatileqatigiiffiullu Illuut A/S-ip siulersuisuini ilaasortat taarserneqarput.

Kalaallit Airportsimulli tunngatillugu taamak sukkatigisumik iliuuseqartoqarsinnaasimanngilaq, tassa danskit naalagaaffiat piginneqataasutut siulersuisut ilaasortassaannik nutaanik akuerseqataasussaq ilaatinneqartussaammat.

Uku ilaasortaajunnaarsinneqassapput

Kalaallit Airportsimili immikkut ittumik ataatsimeersuarnissamut qaaqqussummi takuneqarsinnaavoq, Savalimmiormiu timmisartoqarfimmi pisortaasimasoq Jákup Sverri Kass, siulersuisuni siulittaasup tullia aamma Royal Arctic Linemi pisortap tullia Aviâja Lyberth Lennert soraarsinneqarniartut, Demokraatillu siulittaasorisimasaanit Niels Thomsenimit aamma Sønderborgimi timmisartoqarfimmi maanna pisortaasumit Christian Bergimit taarserneqasssasut.

Ataatsimeersuarnissaq aggustusip 24-ani pisussatut aalajangiunneqarsimavoq, oqaluuserisassarlu "siulersuisuni ilaasortassanik allanik taasineq" pisariaarussinnaavoq, danskit naalagaaffianit immikkut ittumik ataatsimeersuarnissaq itigartitsissutigineqarpat.

Overtager Niels Thomsenip, Jákup Sverri Kass taarserlugu siulittaasup tulliatut atuuffeqalissaguni, ukiumut 300.000 koruunit aningaasarsiarisassavai.

Siulittaasunngorniunnissaq

Kim Kielsen siulersuisuni ilaasortanik sooq taarsersuipallanniartiginersoq oqaluuserineqangaatsiarsimavoq. IA-mi politikkeriusimasoq Maliina Abelsen Visit Greenlandip siulersuisuini siulittaasutut soraarsitaanini politikkikkut aalajangernerusoq nassuiaanneqarsimavoq. Taamaammat eqqarsaasersuutigineqarsimavoq, Pitsi Hæeghip Kujataaneersup ilaasortanngortinneqarnera tunngavimmik tassannga qulakkeerinninniarnerunersoq, siulittaasunngorniunnissamummi atatillugu Kim Kielsen Vivin Motzfeldtimut aamma Kujataaneersumut unamminissamut periarfissagissaarnerulersissinnaavaa.

Niels Thomsen Inatsiartunut kingullermik qinersisoqarmat taaguunneqarluarpoq, timmisartoqarfiliornissallu oqallisaaffiunerpaaffiani Kim Kielsenip naalakkersuisooqatigiivinut tapersersortaanissaq qulakkeerlugu.

Kim Kielsen immaqa naliliisimavoq, Ilulissaneersup aalisartutut inuussutissarsiutilittullu nuannarineqarluartup, juulip qaammataani Ilulissani siulittaasunngorniunnissamut atatillugu immikkut iluaqusersinnaagaani.

Najukkaneersut taasinerat iluaqutaassasoq

Kim Kielsenip Avannaata Kommuniani illoqarfiit annersaata timmisartoqarfissuartaarniarnerani, najukkamit sinniisumik timmisartuutileqatigiiffimmut ilaasortanngortitsigami, Siumut Avaanani inissisimanini iluaqusersimasinnaavaa.

Tassa siulersuisuni ilaasortanik taarsersuineq, nunami partiit annersanni maanna siulittaasuusup pilersaarutaanut ilaasimasinnaavoq, siulittaasunngorniuttoqartinnagu avannaani kujataanilu isumaqatissarsiornermut tamanna atorsimasinnaavaa.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER