Kielsenip Karrat Kangerluanni qaqqap sisoorsinnaaneranik naliliinerit kingulliit saqqummiuppai

Innuttaasunik ataatsimiititsinermi tassani Naalakkersuisut Siulittaasuata Kalaallit Nunaanni Upalungaarsimanermut ataatsimiititaliap Karrat Kangerluanni qaqqap sisoorsinnaaneranut tunngatillugu naliliinerit nutartikkat saqqummiuppai.

Aarlerinaateqarnera ”qaffasissorujussuusoq”

- Karrat Kangerluanni qaqqaq ingerlaavartumik nakkutigineqarpoq, aammalu misissuinerni uppernarsineqarpoq nutaanik qaqqap sisoorsinnaanerata aarlerinaateqarnera suli ”qaffasissorujussuusoq”. Sumiiffimmi aarlerinartoqartumi ilisimaneqareersumi qaqqap innartaanni qajannartortaasut arlaqartut paasineqarput, aarlerinaateqarneranik naliniinermi Kim Kielsenip nassiussaani tamanna allaqqavoq.

Tassani allaqqavoq, tullianik qaqqap sisoornera annertunerusoq qaqugu pissanersoq siumut eqqoriarneqarsinnaanngilaq. Naatsorsuutigineqartariaqarpoq tullianik annertunerusumik qaqqap sisooreernerata kingorna, nutaanik qaqqap sisoorsinnaanerata aarlerinaateqarnera suli qaffasissorujussuusussaasoq.

Aarlerinartunut takussutissat

- Periaatsit assigiinngitsut arlallit atorlugit, pingaartumik nunap sannaanut paasissutissanik nalunaarsukkanik aamma nunap assinginik, nunap ilusaanut nunap assinginik, assinik najoqqutassanik qangarnisanik taamatullu nutaanik, nunap sajuppillattarneranut paasissutissanik nalunaarsukkanik kiisalu satellitsikkoortumik assilisanit immiussanit aamma radarikkut paasissutissanik nalunaarsukkanik nalilersuinikkut sumiiffiit aarlerinartortaqartut arlallit paasineqarput. Sumiiffinni taakkunani marlunni aarlerinaataasut annertussusaat qaffasissorujussuusoq naliliisoqarpoq, taamaalillunilu allannguuteqarani, imaluunniit allaat 2017-imi aasaaneranit suli qaffasinnerulluni, tamanna upalungaarsimanikkut naliliinermi nutartikkami atuarneqarsinnaavoq.

Naliliineq naapertorlugu, Karrat Kangerluanni qaqqaq arlalinnik annertuunik sanngiinnersaqarpoq. Satellitsikkut paasissutissat nalunaarsukkat 2017-imi ukiuunerata ingerlanerani aammalu 2018-imi upernaakkut pissarsiarineqartut atorlugit takuneqarsinnaavoq, qaqqap innartai arlallit suli nikikkiartuaartoqartut aammalu taakkunani ukiuunerata ingerlanerani aamma nikikkiartuaartoqarsimasoq. Annertunerusunik nutaanik qaqqap sisoorsinnaaneranut aarlerinaateqarnera suli qaffasissorujussuuvoq.

Annertunerusunik qaqqanik sisoortoqararsinnaanera

Arlalinniksanngiitsortaqartoq isumaqarpoq, Karrat Kangerluanni nutaamik qaqqaq sisuussagaluarpat, tamatuma kingorna suli kangerlummi qaqqat innartaanni allanik pisoqartussaasoq, nutaanik annertunerusunik qaqqamik sisoortitsisunik.

- Karrat Kangerluanni ulloq 17. juni 2017 qaqqap sisoornera aammalu maannakkut qaqqap innartai pisoqarfiusoq, nikikkiartuaarnerat sivisoorujussuarmik ingerlaarsinnaavoq, ilaannikkut unissinnaalluni aallarteqqissinnaallunilu, imaluunniit tassanngaannaq nakkartoqarsinnaalluni. Taamaattumik qaqugu nutaanik sisoortoqassanersoq oqaatigineqarsinnaanngilaq, Karrat Kangerluata nalilerneqarnerani ilaatigut tamanna oqaatigineqarpoq.

Sumiiffik qanitaaniittoq aarlerinanngitsoq

Paasissutissat nalunaarsukkat aamma ilisimasat Nuugaatsiami aamma Illorsuarmi aarlerinaataasunik uppernarsaataasut peqatigisaanik takutippaat, Uummannap kangerluani inoqarfiit allat: Ikerasak, Niaqornat, Qaarsut, Saattut, Ukkusissat aamma Uummannaq, tunngavissat pigineqartut tunngavigalugit Karrat kangerluannit qaqqamik sisoortoqarnerani qaffasissumik aarlerinartorsiornissaannut tunngavissaqanngitsoq, taamaattumillu navianartorsiorfiusutut isigineqartariaqanngitsut.

- Tamatumunnga pissutaavoq, mallit inoqarfinnut ingerlaartussat sumiiffimmut ammaannartumut itisoorujussuarmik imaqartumut anillaattussaanerat. Tassani mallit nukingat siammartussaavoq, aammalu inoqarfinnut taakkununnga anngutissagunik, mallit portussusaat annikitsuaraasussaalluni, Kalaallit Nunaanni Upalungaarsimanermut ataatsimiititaliap Karrat Kangerluanni naliliinerani tamanna atuarneqarsinnaavoq.