Kielsenip Erik Jensen inissippaa
Naalakkersuisut siulittaasuata Kim Kielsenip inuussutissarsiornermut aatsitassarsiornermullu akisussaaffiit agguataarneqarnerat allanngortinnianngilaa, taamaalilluni Erik Jensen ajorsarpoq.
Aatsitassarsiornermik saqqummersitsiviit annersaanni Torontomi, PDAC-imi, marsip aallartinnerani ingerlanneqartumi, misissuinissamut aamma piaanissamut akuersissutit suliarineqarnerini allaffissornerujussuup annikillineqarnissaa pillugu, aatsitassarsiornermut naalakkersuisoq Erik Jensen sammivinnit arlalinnit kissaateqarfigineqarpoq.
Aatsitassarsiornermik suliaqartut allaffissornerup naalakkersuisoqarfiup ataasiinnarmiitinneqarnissaanik siunnersuutaat Erik Jensenimit maluginiarneqarpoq, taassumalu aviisimut Sermitsiamut siumut kalerriutigaa, Naalakkersuisuni tamanna qaqinniarlugit, Naalakkersuisut siulitaasuata kisimi naalakkersuisoqarfiit qanoq agguataarneqarnissaat aalajangertussaammagu.
Aalajangiusimasumik itigartitsineq
Siulittaasoq kisimi apeqqutinut taamaattunut suliaqarsinnaanera pillugu Kim Kielsenip paatsuugassaanngitsumik oqaasertalerlugu Erik Jensen nalunaarfigisimagaa, Sermitsiaq.AG-p tusarpaa. Inuussutissarsiornermut naalakkersuisoqarfiup suliassaqarfiinik annikilisaasussamik, naalakkersuisoqarfiillu katitigaanerisa allanngortinneqarnissaat Kim Kielsenip eqqarsaatiginngilaa.
IA-p siulittaasua Múte B. Egede Demokraatit siulittaasorigallagaat Randi Vestergaard Evaldsen assigalugu, aatsitassarsiornermik suliaqartut siunnersuutaat taperserlugu, ataatsimeersuarnerup ingerlanneqarnerani Sermitsiaq.AG-mut ilisimatitsipput.
- Aatsitassarsiornermi siuariartornermik pilersitsiniarnermi aporfiit annersaat tassaavoq allaffissornikkut aaqqissuussaanermi matoqqanerujussuaq, IA-mi siulittaasoq Múte B. Egede Torontomi Sermitsiaq.AG-mut taama oqarpoq, nangillunilu:
- Ataasiinnarmik isaaveqarneq atuutilerseqqissavarput, tassani aalajangiinerit aatsitassarsiornermut tunngasut naalakkersuisoqarfimmut ataatsimut inissinneqassallutik – tassa aatsitassanut naalakkersuisoqarfimmut.
Randi: Sulineq eqaalisarneqassaaq
Randi Vestergaard Evaldsenip aamma allannguisoqarnissaa isumaqataaffigaa, imatullu tunngavilersuivoq:
- Sulineq pisariillisassavarput. Nunarput nutaanik pingaarutilinnillu isertitaqarnissaa qulakkeernissaa neriuuteqarfigissagutsigut eqaannerulersissavarput.
Kim Kielsenip akerlianik IA-mi siulittaasoq qinersinerup kingorna allannguinissamut sunniuteqarsinnaalissagunik, taamatut naalakkersuisoqarfimmik allannguiniarpoq.