Kielsenip biilii Nunatta Karsianut akisusut

Kim Kielsenip biillii 2014-imi novembarip qaammataaniit 2019-imut 688.619 koruuninik akileraartartut aningaasaataannit akilerneqartarsimapput.

Kim Kielsenip biiliinut tunngatillugit 2014-imi novembarip qaammataaniit 2019-imut akiligassat 688.619 koruuniusut Namminersorlutik Oqartussanit akilerneqartarsimapput.

KNR allagaatinik takunnissimasoq taamatut allappoq.

Akiligassat ilaatigut benzinarsisarnermut, aaqqissuussisitsisarnermut, sillimmasiisarfimmut akiliuteqartarnermut, qamutit motoorillit akitsuutaannut akiliuteqartarnermut biilinillu attartortarnermut tunngassuteqarput.

Piffissami pineqartumi Kim Kielsen akeqanngitsumik biileqartitaanerminut akileraarutitigut 126.00 koruuninik akiliuteqarsimavoq.

KNR-imit Kim Kielsen atuisimanera pillugu oqaaseqartinniarneqarsimagaluarpoq.

Benzinamik atuisimanera ukkatarineqartoq

Kim Kielsenip biilimik atuinera, naalakkersuisuusimasup Doris J. Jensenip benzinkortimik atornerluisimaneranik qulaajaanermut atatillugu sammineqarsimavoq.

Taamanikkut Sermitsiaq.AG-mit oqaluttuarineqarpoq, Kim Kielsen qaammatit 16-it ingerlaneranni 18.477,04 koruunit nalingannut benzinarsisimasoq. Tassa Naalakkersuisut Siulittaasuat atorfilittut inigisaminit Naalakkersuisut Siulittaasuata Naalakkersuisoqarfianut suliartortarfia ungasinngikkaluartoq.

Akerlianik Inuit Ataqatigiit siulittaasorisimasaat Sara Olsvig piffissami pineqartumi benzinamut 2.271,35 koruuninik atuisimalluni.

Umiatsiaminik alakkaalluni biilikulaarsimasoq

Kim Kielsenip taamanikkut Sermitsiaq.AG-mit apersorneqarnermini nassuiaatigaa, umiatsiani biilerluni alakkakulaarsimallugu:

- Aasaanerani ukiuuneranilu minnerpaamik ullormut marloriarlunga pingasoriarlungaluunniit angallatiga alakkarlugu umiarsualiviliartarpunga. Ajortumik pisoqannginnersoq nakkutiginiarlugu.

- Aap, politiitut sulillunga angalaartarsimanera suli timinniittoq nassuerutigisariaqarpara. Illoqarfimmi biilerlunga nakkutiginnillunga angalaarajuttarpunga, politikeritullu aamma tamatuma saniatigut inuit assigiinngitsut illoqarfimmi naapittarnissai uannut pingaaruteqarpoq – inuiaqatigiinni inissisimaffinnit tamanit assigiinngitsuneersut, Kim Kielsen taamanikkut oqaluttuarpoq.

Powered by Labrador CMS