Kielsenip assoralisimaaluni ukiakkut ataatsimiinneq aallartissavaa

Kalaallit Nunanni politikkikkut aalassassimaartoqarpoq, Naalakkersuisullu Siulittaasuat ukiakkut ataatsimiinnermi arlalinnik suliassaqarpoq ilungersunartunik.

Inatsisartut ukiakkut ataatsimiinnissaat ullumi aallartissaaq, taamalu ukiakkut politikkikkut suliassat allartinneqassallutik.

Naalakkersuisut siulittaasuata Kim Kielsenip tatisimaneqarluni Inatsisartut ataatsimiinnissaat ammarlugu ullumi oqalugiassaaq.

Kim Kielsenimummi tunngatillugu arlalinnik saqqummiussisoqartarsimavoq, illuatungiliuttut ataatsimiinnermi periarfissaqassappat, qularnanngitsumik siulittaaasumut tunngatillugu politikkikkut suliaqartoqarnissaanik kimigiisissapput.

Suliaqartoqarnissaanik kimigiiserneq partiip tapersersortaasup, Demokraatit, aamma malugisinnaassaavaat, ataatsimiinnerummi ingerlanerani tatiginnikkunnaarnermik taasititsisoqassappat Kim Kielsenimik illersuisussaagamik.

Kim Kielsenimut tunngatillugu ilungersunarnerpaaq tassaavoq, Kim Kielsen nipisattassiissutinik upernaaq qaffaasoqarmat peqataagami suliamut attuumassuteqarpallaarsimersoq pillugu apeqqusersuisimanerit.

Pineqartoq aasap ingerlanerani sammineqangaatsiarsimasoq. Sermitsiaq.AG-llu paasissutissaatai naapertorlugit, illuatungiliuttut sulissutigaat, suliaq pillugu kukkunersiuinermut ataatsimiititaliap nassuiaataa ukiakkut ataatsimiinnermi Inatsisartunit suliarineqarnissaa .

Ataatsimiitialiap suliami Kielsen sakkortuumik isornartorsiorsimavaat.

Atassut: Kielsen qanoq sivisutigisumik illersorneqassava

Kim Kielsenip angallatini inummut nipisanniartumut attartortissimavaa. Angallat inuussutissarsiutitut atorneqarnissamut akuerisaasimanngitsoq.

Illuatungiliuttut partiiata Atassutip sisamanngormat unnukkut Demokraatit qanoq sivisutigisumik Kim Kielsenimut tapersersuiniarnersut akissuteqarfigeqqusimavaa:

- Paaserusunnarpoq Demokraatit suli Kim Kielsenimut taperseeqataaginnarniarnersut, naak unioqqutitsinerpassuit pisimagaluartut, Atassummi siulittaasoq Aqqalu C. Jerimiassen tusagassiorfinnut nalunaaruteqarnermi allappoq.

Mittarfiit oqallisigisineqassasut

Tamakkua saniatigut Kim Kielsen Naalakkersuisuutitaalu Qaqortumi mittarfiliorniarnerup taamaatiinnarneqarnera pillugu aamma ilungersunartumik suliassaqarput.

Kalaallit Airportsip siulersuisuini siulittaaup mailikkut allagaqarnermini erseqqissaatigisimavaa, ingerlatseqatigiiffimmut aningaasaliissutaasimasut eqqarsaatigalugit suliassaq naammassineqassappat, mittarfissaq 300 miiterinik naannerusariaqartoq.

Siunnersuut tamanna Kim Kielsenip Kommuni Kujallermi parteeqataasa sakkortuumik akerliliiffigereerpaat. Aappaatigut missingersuutini milliardip affaasa missaanik naleqartumik coronamut akiligassanit tatineqartumi, aallaqqaammut pilersaarutaasimasup naammassineqarnissaanut aningaasanik immikkut nassaarniarnissaq ajornarsinnaavoq.

Tassunga atatillugu Kim Kielsen Naalakkersuisullu Inatsisartut peqatigalugit aningaasanik amerlanerusunik tunniussisoqassanersoq naannerusumilluunniit mittarfiliortoqassanersoq pillugit aaqqiissutissarsiortariaqassapput.

Suliat sammineqarsimasut allat

Suliat sammineqarsimasut allat aamma Kim Kielsenimut annerusumik minnerusumilluunniit attuumassuteqarput.

Aviisimi Sermitsiami qaammammi matumani siusinnerusukkut oqaluttuarineqarpoq, Siumumi politikkerit nuimasut pingasut, umiatsianik aalisarnermi atugassaminnik pisiaqarnissamut hundrede tusintinik arlalinnik nalilinnik pisortanit taperneqarsimasut.

Tamatuma malitsigisaanik Inuit Ataqatigiit piumasarisimavaat, Kukkunersiuinermut Ataasimiititaliap qulaajaaffigissagaa, politikkerit salliutinneqarsimanersut.

KNR-p aamma tallimanngormat ullaakkut allaaseraa, Kim Kielsenip biillii 2014-imiit 2019-imut 680.000 koruunit missaannik Namminersorlutik Oqartussanut naleqarsimasut.

Inatsisartut ullumi aqqanermut ataatsimiinnerat allartissaaq, Inatsisartullu siulittaasussaannik qinersisoqareerpat pilersaarutit malillugit Kim Kielsen ammaanersiorluni oqalugiassaaq.

Powered by Labrador CMS