Kielsenip akissutaa: Kammeradvokatip nipisaat pillugit suliaq misissussavaa
Naalakkersuisut siulittaasuat Siumumit nassuiaatinneqarsimavoq aamma nipisattassiissutinut suliami inissisimaffini pillugu parteeqatiminut nassuiaasariaqarsimavoq. Kim Kielsenip, suliami attuumassuteqartutut kammalaatersortutullu pasillerneqarnerminit pinngitsuutinneqarusukkami, suliaq Kammeradvokatimut naliligassanngorlugu ingerlateqqiteqqissimavaa.
- Siumup siulersuisuunerinut nassuiaasariaqarsimavunga. Aamma Siumup Inatsisartuni gruppianut suliaq saqqummiuttariaqarsimavara.
Naalakkersuisut siulittaasuat Kim Kielsen nipisattasseeqqilluni suliami assortuussutaaqisumi suliamut akuusinnaatitaanermut AG apeqquteqarmat taama nassuiaasoq, aviisi AG allappoq.
Maniitsumi Nuummilu nipisanniartunut nipisattasseeqqinnissaq Naalakkersuisut maajip aqqaneq-aappaanni ataatsimiinnerani aalajangerneqarpoq. Naalakkersuisut nipisattasseeqqinnerat aalisarnermik inuussutissarsiuteqartunit, aalisarnermut ataatsimiisitaliamit aamma partiinit illuatungiliuttunit sakkortuumik kingorna isornartorsiorneqarpoq.
Siullermik isornartorsiutigineqarpoq nipisattasseeqqinnermi Kalaallit Nunaata MSC-mut akuersissutaata pisasseeqqinnerup kinguneranik annaaneqarsinnaanera. Kingorna Kim Kielsenip Nuummi Maniitsumilu nipisattasseeqqinnermi suliamut aalajangiinermi akuusinnaatitaaneranut isornartorsiuineq sangutinneqarpoq.
- Aalajangeeqataavunga. Aamma Naalakkersuisut tamarmiusut aalajangernerat attappara, Naalakkersuisut siulittaasuat oqarpoq.
IA-p suliami peqataasinnaanera apeqquserpaa
Inuit Ataqatigiit Inatsisartuni gruppiat, Kim Kielsenip nipisattasseeqqinnermi suliamut aalajangernermi akuusinnaatitaaneranut sapaatip akunnera kingullermi marlunngornermi apeqqusiisuupput.
Partiip tusagassiuutinut nalunaarummini ersersippaa Naalakkersuisut, Kim Kielsen siuttoralugu, Nuummi Maniitsumilu maajip aqqaneq-aappaani nipisattasseeqqimmata Kielsenip ikinngumminut nipisanniartumut angallatini attartortissimagaa. Tamatuma kingorna partii illuatungiliuttoq §37 naapertorlugu Naalakkersuisunut arlaqartunik apeqquteqarpoq.
- Uunga saqitinneqaqattaarpoq Kim Kielseni aalajangiiniarnermi anillassimasariaqaraluartoq. Taanna massakkut nalilersortinneqarpoq. Kammeradvokatimut suliakkiissutigivarput, Kim Kielsen oqarpoq.
Aviisimi AG-mi atuarnerusinnaavutit. Aviisi uani pissarsiariuk: